2024 წლის საბავშვო ევროვიზიის სიმღერის კონკურსამდე მხოლოდ ორი თვეღა გვაშორებს. ყოველწლიური საერთაშორისო მუსიკალური უკვე 22-ედ გაიმართება. ევროვიზია ჯუნიორს წელს ესპანეთის დედაქალაქი მადრიდი უმასპინძლებს.

ცოტა ხნის წინ კი, ცნობილი გახდა, რომ საბავშვო ევროვიზია 2024-ში მონაწილეობას მიიღებს 17 ქვეყანა, მათ შორის, საქართველო. აღსანიშნავია, რომ კონკურსზე ორი ქვეყანა დიდი პაუზის შემდეგ ბრუნდება: კვიპროსი და სან-მარინო. კვიპროსი საბავშვო ევროფესტივალზე ბოლოს 2017 წელს მონაწილეობდა, სან-მარინო კი კონკურსს 2016 წლიდან გამოეთიშა.

აი, წელს კი საბავშვო ევროვიზია გაერთიანებულმა სამეფომ დატოვა, რომელმაც შარშანდელ კონკურსზე მე-4 ადგილი დაიკავა.

მონაწილე ქვეყნებთან ერთად, ცნობილი გახდა წლევანდელი ევროვიზია ჯუნიორის სლოგანი და თემაც. Let’s Bloom! ("აყვავდი!") — 17 ქვეყნის წარმომადგენელ პატარა მუსიკოსებს წელს ეს დევიზი გააერთიანებს.

2024 წლის საბავშვო ევროვიზიის სცენის დიზაინი

ფოტო: RTVE

საბავშვო ევროვიზიაზე საქართველოს წელს ანდრია ფუტკარაძე წარადგენს. 11 წლის მუსიკოსმა მასშტაბურ კონკურსზე ქვეყნის წარმომადგენლის სტატუსი პირველი არხის პროექტ რანინაში გამარჯვების შედეგად მოიპოვა. მოგვიანებით გახდება ცნობილი, რა სიმღერას შეასრულებს ანდრია მადრიდში, 16 ნოემბერს.

ფოტო: რანინა / საზოგადოებრივი მაუწყებელი

გასულ წელს, ნიცაში გამართულ საბავშვო ევროვიზიაზე გამარჯვება ისევ საფრანგეთს ხვდა წილად: ზედიზედ მეორედ, ჯამში კი — მესამედ. როგორც წესი, მომდევნო წლის კონკურსის მასპინძლობას სწორედ გამარჯვებულ ქვეყანას სთავაზობენ, მაგრამ საფრანგეთმა, სადაც საბავშვო ევროვიზია 2021-შიც ჩატარდა, ამჯერად ეს უფლება მეორეადგილოსან ესპანეთს დაუთმო.

საქართველო კი, უკვე საფრანგეთთან ერთად, საბავშვო ევროვიზიის რეკორდსმენ ქვეყნად რჩება სამი გამარჯვებით. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამას გარდა, საქართველომ ევროვიზია ჯუნიორზე ორჯერ დაიკავა მეორე ადგილი და ხუთჯერ მოხვდა საუკეთესო ხუთეულში.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...