სომხეთმა კოლექტიური უსაფრთხოების ხელშეკრულების ორგანიზაციასთან (CSTO) ყველა დონეზე ურთიერთობების გაყინვა და დისტანცირება გადაწყვიტა, — ამის შესახებ სომხეთის პრემიერ-მინისტრმა ნიკოლ ფაშინიანმა პრესკონფერენციაზე განაცხადა, სადაც ერევნის ორგანიზაციიდან გასვლის შესაძლებლობის შესახებ შეკითხვას უპასუხა:

"სომხეთის რესპუბლიკამ გაყინა მონაწილეობა CSTO-ში ყველა დონეზე. ჩვენ ეს გადაწყვეტილება ამ ეტაპზე საკმარისად მიგვაჩნია", — განაცხადა ფაშინიანმა და აღნიშნა, რომ სხვა გადაწყვეტილების მიღების აუცილებლობას ვერ ხედავს, თუმცა ეს იმას არ ნიშნავს, რომ "ეს მომავალში არ მოხდება".

სომხეთში ამბობენ, რომ ორგანიზაციის წესების მიხედვით, მისი წევრები აზერბაიჯანთან ომის დაწყებისას სომხეთის დასახმარებლად უნდა გამოსულიყვნენ, მაგრამ მათ ეს არ გააკეთეს და ერევნის თხოვნა არ გაითვალისწინეს.

ამრიგად, ოფიციალურ ერევანს მიაჩნია, რომ ორგანიზაციამ აჩვენა "უმწეობა და ის, რომ რეალურად მხოლოდ ქაღალდზე არსებობს და ვერ ასრულებს პარტნიორების წინაშე ნაკისრ ვალდებულებებს".