ქართული ოცნების საარჩევნო კამპანიის რეგიონულ ღონისძიებაზე მცხეთაში სიტყვით გამოსვლისას ქართული ოცნების საპატიო თავმჯდომარემ, ბიძინა ივანიშვილმა განაცხადა, რომ პირველი მიზეზი, რისთვისაც ქართულ ოცნებას 2024 წლის 26 ოქტომბრის არჩევნებში საკონსტიტუციო უმრავლესობა სჭირდებათ, ნაციონალური მოძრაობის "აკრძალვა და გასამართლებაა“.

დღეს საქართველოს პრემიერ-მინისტრმა განმარტა, კონკრეტულად რომელი პარტიების აკრძალვას აპირებს ქართული ოცნება ოქტომბრის არჩევნებში საკონსტიტუციო უმრავლესობის მოპოვების შემთხვევაში.

კობახიძე ამბობს, რომ “კოლექტიურ ნაცმოძრაობას“, პარტია ნაციონალური მოძრაობის გარდა, განეკუთვნება ახალი, გირჩი და დროა, რადგან „ყველა ამ პოლიტიკოსს წარსულიც და აწმყოც პირდაპირ აქვს დაკავშირებული ნაცმოძრაობასთან“.

პრემიერმა ასაკრძალი პარტიების რიგებში ასევე დაასახელა ლელო და გიორგი გახარიას პარტია საქართველოსთვის.

„არის ასეთი გაერთიანება ლელო, რომელიც პირდაპირ იყო ჩართული ბიზნეს-რეკეტში და ესეც უნდა იყოს გამოძიების ერთ-ერთი საგანი. პირდაპირ, ნაცმოძრაობის რეჟიმთან ერთად, ამ პოლიტიკური ძალის ლიდერები იყვნენ ჩართული ბიზნესის რეკეტში, რაზეც ასევე უნდა აღსრულდეს სამართალი.

გახარია, რომელსაც აქვს შექმნილი კოალიცია ნაცმოძრაობასთან ოთხ მუნიციპალიტეტში, პირდაპირ ალიანსშია კრიმინალურ პოლიტიკურ ძალასთან. ეს არის ერთი კოლექტიური კრიმინალური პოლიტიკური ძალა, რომელიც აუცილებლად უნდა გასამართლდეს. დანარჩენზე გადაწყვეტილებას მიიღებენ შესაბამისი ინსტანციები“, — აცხადებს კობახიძე.

გამოდის, რომ ასაკრძალი პარტიების სიაში არიან:

1. ერთიანი ნაციონალური მოძრაობა და მის ირგვლივ შექმნილი კოალიცია (სტრატეგია აღმაშენებელი, ევროპული საქართველო);

2. ახალი, გირჩი, დროა – კოალიცია ცვლილებებისთვის;

3. ლელოს კოალიცია;

4. გიორგი გახარიას პარტია საქართველოსთვის.

ჟურნალისტის კითხვაზე - იმ ფონზე, როცა მმართველი გუნდი ნაციონალური მოძრაობის გაუქმებაზე საუბრობს, გაუუქმდებათ თუ არა მანდატები ნაციონალური მოძრაობის იმ დეპუტატებსაც, რომლებიც პარლამენტში შევლენ, კობახიძე ამბობს, რომ პარტიის აკრძალვის ლოგიკური გაგრძელება იქნება მანდატების გაუქმებაც.

ამ თემაზე წაიკითხეთ:

კობახიძე: ნაციონალური მოძრაობის პარტიის აკრძალვის შემდეგ, ლოგიკური გაგრძელება მათი მანდატების აკრძალვაც იქნება