ნაციონალური მოძრაობის პარტიის აკრძალვის შემდეგ, ლოგიკური გაგრძელება მათი მანდატების აკრძალვაც იქნება — ამის შესახებ ირაკლი კობახიძემ, ჟურნალისტებთან საუბრისას განაცხადა.

"მანდატების გაუქმება შეუძლია მარტო საკონსტიტუციო სასამართლოს ჩვენი მოქმედი კონსტიტუციის თანახმად. მე ვფიქრობ, რომ პარტიის აკრძალვის ლოგიკური გაგრძელება იქნება, ბუნებრივია, მანდატების გაუქმებაც. არ შეიძლება დანაშაულებრივი პოლიტიკური ძალის დამნაშავე წევრები სარგებლობდნენ ისეთი სტატუსით, როგორიც არის საქართველოს პარლამენტის წევრობა.

პარლამენტი დარჩება დემოკრატიულად არჩეული, სადაც ქართულ ოცნებას ექნება საკონსტიტუციო უმრავლესობა, ეს არის მნიშვნელოვანი". — ამბობს კობახიძე.

ჟურნალისტის კითხვაზე, თუ რა რეაქცია ექნება დასავლეთს ერთპარტიულ პარლამენტზე და შეუშლის თუ არა ეს ხელს საქართველოს ევროკავშირში გაწევრიანებას, პრემიერმა მაგალითად მოლდოვის პარლამენტი მოიყვანა

"მოლდოვის პარლამენტი დღეს ფაქტობრივად ერთპარტიულია, მაგრამ არავინ არ საუბრობს ამაზე, არაფერი არ ხდება ასეთ დროს, მოლდოვის პარლამენტი არის ფაქტობრივად ერთპარტიული მაგრამ ყველა მიესალმება მოლდოვის პარლამენტს, იგივე მოხდება საქართველოშიც. ერთი და იგივე სტანდარტი უნდა მოქმედებდეს ყველა კანდიდატ ქვეყანაში, როგორც საქართველოში ისე მოლდოვაში და უკრაინაში". — თქვა კობახიძემ.