20 აგვისტოს, ცნობილი გახდა, რომ "რუსული კანონის" აღსასრულებლად შექმნილ დეპარტამენტს სანდრო კირვალიძე უხელმძღვანელებს.

საჯარო რეესტრის ვებგვერდზე განთავსებული ინფორმაციით, 1992 წელს დაბადებული სანდრო კირვალიძე განათლებით იურისტია. ის მანამდე ქონების რეგისტრაციის დეპარტამენტის უძრავ ნივთებზე უფლებათა რეგისტრაციის სამსახურის მენეჯერი იყო.

როგორც NEWS.On.ge-სთვის ხდება ცნობილი, სანდრო კირვალიძე 2015 წლიდან, არასამთავრობო ორგანიზაცია "ასოციაცია საქართველოს აზერბაიჯანთა კავშირი რეფორმების და განვითარების ხელშეწყობისათვის" — გამგეობის წევრი იყო.

საჯარო რეესტრის შესაბამისი დოკუმენტებიდან ირკვევა, რომ კირვალიძემ იუსტიციის სახლს არასამთავრობო ორგანიზაციის გამგეობის წევრობიდან ამოწერის განცხადებით 14 აგვისტოს მიმართა და დაჩქარებული წესით, 1 დღეში ამოსაწერად, 207 ლარი გადაიხადა.