6 აგვისტოს, უკრაინის თავდაცვის ძალები კურსკის ოლქში შევიდნენ. იერიშის შედეგად [13 აგვისტო] ბოლო მონაცემებით, უკრაინას დაკავებული აქვს 28 სოფელი რაც დაახლოებით 1000 კვადრატული კილომეტრია.

რუსეთი:

რუსეთმა, 9 აგვისტოს კურსკის რეგიონში საგანგებო მდგომარეობა ფედერალურ დონეზე გამოაცხადა. ფაქტს გამოეხმაურა, რუსეთის პრეზიდენტი ვლადიმერ პუტინიც და უკრაინის ქმედებას "დიდი პროვოკაცია" უწოდა.

"როგორც ცნობილია, კიევის რეჟიმმა მორიგი მასშტაბური პროვოკაცია განახორციელა. სხვადასხვა სახის იარაღს, მათ შორის რაკეტებს, განურჩევლად ესვრიან სამოქალაქო შენობებს, საცხოვრებელ სახლებს, სასწრაფო დახმარების მანქანებს" — ირწმუნებოდა პუტინი.

ასევე, რუსეთმა კურსკის ოლქის მიმდებარე ტერიტორიებიდან ხალხის მასობრივი ევაკუაცია დაიწყო. პუტინმა მათ ვისაც სამხედრო მოქმედებების შედეგად სახლის დატოვება მოუწიათ, დახმარების სახით 10 000 რუბლის (314 ლარი) დაჰპირდა.

9 აგვისტოს, შუადღეს რუსეთმა უკრაინის ქმედებების საპასუხოდ უკრაინა დაბომბა. რუსეთის ჯარმა, დონეცკის ოლქის ქალაქ კონსტანტინოვკაზე იერიში მიიტანა, რა დროსაც დაიღუპა 14 ადამიანი და დაშავდა 40-ზე მეტი პირი.

უკრაინის ქმედებებს გამოეხმაურა, ვლადიმერ პუტინის მეხოტბე, ჩეჩენი დიქტატორი რამზან კადიროვიც.

"მოიცადეთ 2-3 დღე, კურსკში კარგი შედეგები იქნება." — ამ განცხადებიდან 4 დღე გავიდა, თუმცა უკრაინა უფრო მეტ წარმატებას აღწევს და მეტიც, 11 აგვისტოს ცნობილი გახდა, რომ უკრაინელმა ჯარისკაცებმა 40-ზე მეტი კადიროველი აიყვანეს მძევლად.

11 აგვისტოს რუსეთმა, კიევიც დაბომბა. ბროვარსკის რაიონში კერძო საცხოვრებელ კორპუსებზე რაკეტის ნამსხვრევები ჩამოვარდა.

საგანგებო სიტუაციების სახელმწიფო სამსახურის ინფორმაციით, თავდასხმას მშვიდობიანი მოქალაქეები - 35 წლის კაცი და მისი 4 წლის ვაჟი ემსხვერპლნენ. ისინი შენობის ნანგრევების ქვეშ აღმოჩნდნენ და სამძებრო-სამაშველო სამუშაოების დროს გარდაცვლილები იპოვეს. მძიმედ დაშავდა სამი ადამიანი, მათ შორის 13 წლის ბავშვი.

ფაქტს ცოტახანში, რუსეთის საგარეო საქმეთა სამინისტროს პრესსპიკერი მაია ზახაროვა ტელეგრამში გამოეხმაურა.

"ეჭვი არ გვეპარება, რომ ამ ბოროტმოქმედებების ორგანიზატორები და შემსრულებლები, მათ შორის მათი უცხოელი კურატორები, ამისთვის პასუხს აგებენ. რუსეთის შეიარაღებული ძალების მკვეთრი პასუხი არ დააყოვნებს", — დაწერა ზახაროვამ.

თავიდან პუტინი ირწმუნებოდა, რომ კურსკის ოლქში ყველაფერი კარგად იყო და რუსული ჯარი უკრაინას მალევე დაახევინებდა უკან. თუმცა ყველაფერი საპირისპიროდ შეიცვალა.

ერთ-ერთ საგანგებო თათბირზე, კურსკის ოლქის გუბერნატორის მოვალეობის შემსრულებელმა ალექსეი სმირნოვმა, პუტინს კურსკის ოლქში არსებული სიტუაცია უამბო. თუმცა მას, პუტინმა სიტყვა მალე გააწყვეტინა:

უკრაინა:

12 აგვისტოს უკრაინულმა მხარემ კურსკის ოლქში სანგრების გათხრა დაიწყო — ინფორმაცია გამოცემა Forbes-მა გაავრცელა. გამოცემის აზრით, ეს ყველაფერი კურსკის ოლქის გრძელვადიან უკრაინულ ოკუპაციას ნიშნავს.

"ფრონტის ხაზის გასწვრივ ან მის მახლობლად პოზიციური ომის მოლოდინში, უკრაინელები სანგრებს ჭრიან. სანგრებს თხრიან რუსებიც.

ის, რომ ორივე მხარე აძლიერებს პოზიციებს, არ ნიშნავს, რომ უკრაინელებმა წინსვლა დაასრულეს. ეს არც იმას ნიშნავს, რომ რუსებს არ შეუძლიათ კონტრშეტევა და უკრაინელების უკან დაბრუნება საზღვრამდე. მაგრამ ეს ნიშნავს, რომ დღის წესრიგშია ფრონტის ხაზის სტაბილიზაცია და კურსკის ნაწილის გრძელვადიანი უკრაინული ოკუპაცია." — წერს გამოცემა.

უკრაინის საბრძოლო მოქმედებებს გამოეხმაურა ვოლოდიმირ ზელენსკიც და აღნიშნა, რომ კურსკი პუტინის მმართველობის დასასრული იქნება.

"ჩვენ ვხედავთ, რეალურად როგორ მოძრაობს რუსეთი პუტინის დროს — 24 წლის წინ კურსკის კატასტროფა იყო — მისი მმართველობის სიმბოლური დასაწყისი. და ჩვენ ახლა ვხედავთ, რა არის მისთვის დასასრული. ესეც კურსკია, მისი ომის კატასტროფა. ასე ყოველთვის მათ ემართებათ, ვისაც ადამიანები და ნებისმიერი წესები სძულს. რუსეთმა სხვებს ომი მოუტანა, ახლა ეს სახლში ბრუნდება. უკრაინას ყოველთვის სურდა მხოლოდ მშვიდობა და ჩვენ ამას უზრუნველყოფთ", — განაცხადა ზელენსკიმ.

უკრაინის საჰაერო ძალებმა, გასულ ღამეს რუსეთის მიერ გაშვებული 38 "შაჰიდის" ტიპის დრონიდან 30 ჩამოაგდეს. ასევე რუსეთმა უკრაინას ორი "ისკანდერ-მ"/KN-23 ბალისტიკური რაკეტით შეუტია.

გავრცელებული ინფორმაციით, საზენიტო თავდაცვა მუშაობდა მიკოლაევის, ვინიცის, სუმის, კიროვოგრადის, ხერსონის, ჩერნიგოვის, დნეპროპეტროვსკის და ჩერკასის რაიონებში.

კურსკის ოლქში, საბრძოლო მოქმედებები ახლაც გრძელდება. შეგახსენებთ, უკრაინამ 28 სოფლის დაკავება მოახერხა. [მასალა განახლდება]