შეკვეთილის დენდროლოგიური პარკის Facebook განცხადებაში ვკითხულობთ, რომ ბიძინა ივანიშვილის მიერ შეძენილი ბაობაბის რვა ხე გახმა.

ხეების გახმობის მიზეზად დასახელებულია "ნაციონალური მოძრაობის მიერ კონტროლირებადი მედია და ჩასაფრებული პოლიტიკანები, რომლებიც არაჯანსაღი ვნებებით, ყალბი ალარმისტული საჩივრებით" დენდროლოგიური პარკის მშენებლობის პროცესს, პირველივე დღიდან ებრძვიან, რის გამოც რამდენიმე პროექტი, მათ შორის კენიიდან ბაობაბების გადმორგვა ძლიერ შეფერხდა.

"დროში გაწელვის შედეგად, 2021 წელს გრუნტიდან ამოღებულმა ხეებმა, ხელოვნურად შექმნილი დაბრკოლებების გამო 2023 წლის ოქტომბრამდე ვერ მოაღწია საქართველომდე. მხოლოდ 2023 წლის 08 ნოემბერს მოხერხდა მათი ნიადაგში ჩარგვა. იქამდე კი აფრიკელ „გიგანტებს“ მოუწიათ ამოთხრილ მდგომარეობაში თითქმის ორწლიანი მოცდა მათთვის სრულიად შეუსაბამო გარემო პირობებში, სადაც მათ შესაბამისი მოვლა-პატრონობაც მოაკლდათ. სამწუხაროდ მსგავს სტრესს შეუმჩნევლად არ ჩაუვლია ამ უნიკალური მცენარეებისთვის და საქართველოში გრუნტში ჩარგვიდან 6-7 თვის გასვლის შემდეგ რვავე ბაობაბის ხე გახმა." — წერია, განცხადებაში