ვიტალი გუგუჩია, ცნობილი როგორც "ფორთოხლის გამყიდველი ქიქოძის ქუჩიდან" პროკურატურაში, "პოსტივის" ჟურნალისტისთვის საქმიანობაში ხელშეშლის საქმეზე ბრალის წარსადგენად დაიბარეს. — ინფორმაციას სოციალურ ქსელში, მეუღლე მირანდა ჯობავა ავრცელებს.

„ბრალის წარსადგენად დაიბარეს ვიტა დღეს საღამოს. ჟურნალისტურ საქმიანობაში ხელის შეშლაო. ანუ აქეთ გვდებს ვიქტორ ჯაფარიძის ტელევიზია რაღაცაში ბრალს და ცდილობს გაგვტეხოს, გაგვანადგუროს?! უფრო გავძლიერდებით, თქვენ კი ეს ამბავი გადაგიყოლებთ! იმ ინციდენტის შედეგებს ვიმკით დღემდე, რაზე საუბარიც არ მინდოდა და მიჭირდა, არ ვიყავი მზად“, — დაწერა ვიტალი გუგუჩიას მეუღლემ, მირანდა ჯობავამ.

31 მაისს "პოსტივის" გადამღებმა ჯგუფმა ვიტალი გუგუჩიას ოჯახს, სამეგრელოში ჩააკითხა, სადაც მათ შორის დაპირისპირება მოხდა. ვიტალი გუგუჩია და მირანდა ჯობავა საზოგადოებამ, მაისში გაიცნო.

29 მაისს, მათ მარკეტში "ხალხის ძალის" დეპუტატი, ვიქტორ ჯაფარიძე ბოდიშის მოსახდელად და "ნასროლი ფორთოხლის" თანხის ასანაზღაურებლად მივიდა, მან ფორთოხალი იმ მოქალაქეს ესროლა, რომელმაც წინა დღით, რუსული კანონის მიღების შემდეგ პარლამენტიდან მომავალი დეპუტატების კოლონას აგინა. დეპუტატსა და გუგუჩიას შორის მცირე დაპირისპირებაც მოხდა. წყვილის თქმით, დეპუტატს ბოდიში ფორთოხლის სროლისთვის კი არა სამშობლოს გაყიდვისთვის ჰქონდა მოსახდელი.