ევროკავშირის ლიდერები უნგრეთის პრემიერ-მინისტრის, ვიქტორ ორბანის მიერ, აგვისტოში დაგეგმილ საგარეო საქმეთა საბჭოზე დასწრებაზე უარს ამბობენ და ალტერნატიული სამიტის ორგანიზებას თავად გეგმავენ.

  • 1 ივლისიდან, უნგრეთი, როტაციის წესით, ექვსი თვით გახდა ევროკავშირის თავმჯდომარე ქვეყანა.
  • ამ პოზიციის დაკავებიდან მეორე დღეს, ორბანმა, ევროკავშირის 26 წევრ ქვეყანასთან შეუთანხმებლად, დაიწყო "სამშვიდობო მოლაპარაკებები" უკრაინასთან, რუსეთთან და ჩინეთთან, რასაც ევროპის ლიდერების პროტესტი მოჰყვა. ისინი ამბობენ, რომ ორბანმა ამ მოლაპარაკებებთან დაკავშირებით გადაწყვეტილება თვითნებურად მიიღო და შეხვედრებზე უნგრეთი "ევროკავშირის სახელით არ ლაპარაკობს".

სამიტი, რომელიც ორბანმა დაგეგმა, ბუდაპეშტში უნდა ჩატარდეს. ევროკავშირის ლიდერები, ბოიკოტის ნიშნად, ალტერნატიული სამიტის გეგმას წარადგენენ — კონკრეტულად, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი ჯოზეფ ბორელი ევროკავშირის 27 ქვეყანას ღონისძიების ოფიციალურ გეგმას დღეს, 17 ივლისს წარუდგენს.

დაძაბულობა ევროკავშირსა და უნგრეთს შორის წლების განმავლობაში, ჯერ კიდევ უკრაინაში ომის დაწყებამდე ღვივდებოდა. ორბანის პირობებში, ქვეყანაში არის დემოკრატიული ნორმებისა და კანონის უზენაესობის უკუსვლა, ასევე, ქვეყანა არღვევს ევროკავშირის გამართულ ფუნქციონირებას, შეუსაბამო კანონების მიღებით, ან — საჭირო კანონების დაბლოკვით.