აზერბაიჯანის სასამართლომ პარასკევს, ეთნიკურად სომეხ მამაკაცს მთიანი ყარაბაღიდან, რაშიდ ბეგლარიანს 15 წლით თავისუფლების აღკვეთა მიუსაჯა.

62 წლის ბეგლარიანის ბრალდება მოიცავს "ხოჯალიში აზერბაიჯანელების წინააღმდეგ გენოციდისა და ტერორიზმის ჩადენას“.

Turan-ის ცნობით, განაჩენში აღნიშნულია, რომ ბეგლარიანი სასჯელის პირველ ხუთ წელს ზოგადი რეჟიმის ციხეში მოიხდის, დანარჩენს კი — მკაცრი რეჟიმის სასჯელაღსრულების დაწესებულებაში.

გავრცელებული ინფორმაციით, მის წინააღმდეგ წაყენებული ბრალდებები, ასევე, მოიცავს აზერბაიჯანელი ტყვეების და სხვა პირების წამებას, ასევე სხვა "სერიოზული" და სამხედრო დანაშაულების ჩადენას "და არალეგალური სომხური შეიარაღებული ჯგუფების საქმიანობაში მონაწილეობას", პირველი მთიანი ყარაბაღის ომის დროს.

მოხსენებებში ასევე აღნიშნულია, რომ რაშიდ ბეგლარიანმა დაკითხვისას აღიარა, რომ მონაწილეობა მიიღო ხოჯალის ხოცვა-ჟლეტაში, 1992 წლის თებერვალში.

Turan-ის ინფორმაციით, სახელმწიფო უსაფრთხოების სამსახურმა აღნიშნა, რომ წამების მსხვერპლი პირები იდენტიფიცირებული და მსხვერპლად აღიარებულნი არიან.

აზერბაიჯანისა და საფრანგეთის ურთიერთობების გაუარესების ფონზე, აზერბაიჯანულმა მედიამ ივნისში დაწერა, რომ ბეგლარიანის თქმით, საფრანგეთის მოქალაქეებმა მას, "დახმარების სახით", 2 მილიონი ევრო გადასცეს, ტრანსფერის შესახებ სხვა დეტალები უცნობია.

ბეგლარიანი აზერბაიჯანელმა მესაზღვრეებმა 2023 წლის აგვისტოს დასაწყისში დააკავეს, რეგიონში ცხრათვიანი ბლოკადის დროს, რომელიც დეკემბერში დაიწყო.

აზერბაიჯანის ხელისუფლება ბეგლარიანს ადანაშაულებდა აზერბაიჯანიდან სომხეთში არალეგალურად გადასვლის მცდელობაში, მთიანი ყარაბაღის ხელისუფლებამ კი განაცხადა, რომ ის ალკოჰოლის ზემოქმედების ქვეშ იყო და გზა აებნა.

ბეგლარიანი იყო მეორე სომეხი მთიანი ყარაბაღიდან, რომელიც იმ პერიოდში, აზერბაიჯანმა ერთ კვირაზე ნაკლებ დროში დააკავა.

ვაგიფ ხაჩატრიანი 30 ივლისს დააკავეს, მაშინ, როდესაც ლაჩინის გამშვები პუნქტის გადაკვეთას ცდილობდა, რათა სომხეთში გულის ოპერაცია გაეკეთებინა. აზერბაიჯანმა ის მთიანი ყარაბაღის პირველი ომის დროს სამხედრო დანაშაულების ჩადენაში დაადანაშაულა.

წელიწადნახევრის შემდეგ, ხაჩატრიანს მიესაჯა 15 წლით თავისუფლების აღკვეთა, ხოჯალის მახლობლად, სოფელ მეშალში აზერბაიჯანელი მშვიდობიანი მოსახლეობის ხოცვა-ჟლეტაში მონაწილეობის ბრალდებით, რასაც ის და მისი ოჯახი უარყოფენ.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.