ახალი მემარჯვენეების პოლიტიკური მდივანი, მანანა ნაჭყებია განმარტავს, რომ რუსთავი 2-ის საქმეზე მიმდინარე პროცესის პარალელურად საუბრობდნენ სწორედ იმაზე, რომ მოსამართლეთა კოლეგია სავარაუდოდ, მოსამართლე ურთმელიძის გადაწყვეტილებას ძალაში დატოვებდა:

"სამწუხარო რეალობაა. ამ ხელისუფლების სურვილი იყო ემართა სასამართლო, სასამართლო ყოფილიყო მისი მხრიდან მართული და მასზე დამოკიდებული და ეს ყველაფერი მან გააკეთა მურუსიძის ხელით. მე არ მეგულება ქვეყანაში ადამიანი, რომელმაც არ იცის და ვერ ხვდება, რას ნიშნავდა მურუსიძის მობრუნება ამ სასამართლოს სისტემის სათავეში".

მისი თქმით, ყველაზე მთავარი ისაა, რომ საზოგადოებამ ვერ მოისმინა ვერც ერთი მუხლი, ვერ გაიგონა ვერც ერთი არგუმენტაცი იმის შესახებ, თუ რატომ დატოვა სასამართლომ ურთმელიძის გადაწყვეტილება ძალაში.

თბილისის სააპელაციო სასამართლომ დღეს, 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.