NDI-ის კვლევისას გამოკითხულთა 40 პროცენტისთვის მნიშვნელოვანია, ხოლო 9 პროცენტისთვის ძალიან მნიშვნელოვანია, პარტიას ჰყავდეს ქალი და კაცი კანდიდატების თანაბარი რაოდენობა.

რაც შეეხება უარყოფით დამოკიდებულებას, გამოკითხულების 37 პროცენტი ფიქრობს რომ გენდერული თანასწორობა პარტიაში უმნიშვნელოა, ხოლო 9 პროცენტისთვის - სრულიად უმნიშვნელო.

გამოკითხულთა ნახევარზე მეტის (58%) აზრით, ქალაქის მერის პოზიციაზე ქალიც კარგად იმუშავებს და კაციც. თუმცა, 29 პროცენტი მიიჩნევს, რომ კაცი უკეთ გაართმევს თავს მერის თანამდებობას.

გუბერნატორის თანამდებობაზეც ასევე ნახევარზე მეტი ფიქრობს რომ კაციც და ქალიც კარგად იმუშავებს. ამასთან, 39 პროცენტი კაცს ასახელებს, ხოლო - 5 პროცენტი ქალს.

გამოკითხულთა უმრავლესობის (78%) აზრით, პარლამენტის წევრის პოზიციაზე ქალისა და კაცის შესაძლებლობები თანაბარი იქნება. ასევეა საკრებულოს წევრობის შემთხვევაშიც, სადაც 77 პროცენტი მიიჩნევს იგივეს.

კვლევა დიდი ბრიტანეთის მთავრობის, UK aid-ის ფინანსური ხელშეწყობით ჩატარდა, გამოკითხვას კი CRRC-საქართველო ატარებდა. კვლევის საველე სამუშაოები 18 ივნისი-9 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) შესრულდა. 2 261 პირი, პირისპირ ინტერვიუს სახით, წარმომადგენლობითი შერჩევით გამოიკითხა.