მოკლედ: 27 მაისს, ორშაბათს, 09:00 საათზე, საქართველოს პარლამენტის იურიდიულ საკითხთა კომიტეტი, რუსულ კანონზე, პრეზიდენტს სალომე ზურაბიშვილის მოტივირებულ შენიშვნებს განიხილავს.

ფოტო: საქართველოს პარლამენტი

დეტალები: 18 მაისს, სალომე ზურაბიშვილმა, მთავრობის მიერ მესამე მოსმენით მიღებულ რუსულ კანონს, ვეტო დაადო: "ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად, არის ძალიან მარტივი ვეტო, ეს კანონი უნდა გაუქმდეს".

  • 20 მაისს, პრეზიდენტის საპარლამენტო მდივანმა, გიორგი მსხილაძემ განაცხადა, რომ ვეტოს დადების შემდეგ, საპარლამენტო უმრავლესობის მხრიდან იყო მცდელობა, შეცდომაში შეეყვანა საზოგადოება, თითქოს, პრეზიდენტმა ვეტო, რომელიც რუსულ კანონს დაადო, მოტივირებული შენიშვნების გარეშე დაუბრუნა პარლამენტს.
  • მსხილაძის თქმით, პრეზიდენტის ვეტო მოტივირებულია და მასში აღწერილია საქართველოს კონსტიტუციის ოთხი მუხლი, რომელიც რუსული კანონით ირღვევა და ასევე, განმარტებულია რატომ არის ეს კანონი რუსული.
  • "არის მოყვანილი [კანონის] მიღების მოტივაცია, რა ფორმით იყო ეს კანონი მიღებული და რომ ეს ჩვენთვის არის დაუშვებელი, ხოლო რაც შეეხება კანონში ერთი წინადადების ჩამატებას, რომ კანონი ამოქმედდეს ერთი დღით, ეს არის ჩვეულებრივი იურიდიული ტექნიკა, რომელიც საჭიროა იმისთვის, რომ კანონი გაუქმდეს", — თქვა მსხილაძემ.

გაიგე მეტი: "პრეზიდენტის ვეტო მოტივირებულია. მასში აღწერილია კონსტიტუციის ოთხი მუხლი, რომელიც რუსული კანონით ირღვევა" — გიორგი მსხილაძე

ბოლო ხაზი: ქართულ ოცნებას პრეზიდენტის ვეტოს დაძლევა შეუძლია. ამისთვის 76 ხმაა საჭირო, რუსულ კანონს კი უმრავლესობის 84-მა დეპუტატმა დაუჭირა მხარი.