მოკლედ: საქართველოს პრეზიდენტის საპარლამენტო მდივნის, გიორგი მსხილაძის თქმით, საპარლამენტო უმრავლესობის მხრიდან არის მცდელობა, შეცდომაში შეიყვანოს საზოგადოება, თითქოს, პრეზიდენტმა ვეტო, რომელიც რუსულ კანონს დაადო, მოტივირებული შენიშვნების გარეშე დაუბრუნა პარლამენტს.

  • ამის შესახებ მსხილაძემ დღეს, 20 მაისს, საგანგებო ბრიფინგზე განაცხადა.

დეტალები: მსხილაძის თქმით, პრეზიდენტის ვეტო მოტივირებულია და მასში აღწერილია საქართველოს კონსტიტუციის ოთხი მუხლი, რომელიც რუსული კანონით ირღვევა და ასევე, განმარტებულია რატომ არის ეს კანონი რუსული.

  • "არის მოყვანილი [კანონის] მიღების მოტივაცია, რა ფორმით იყო ეს კანონი მიღებული და რომ ეს ჩვენთვის არის დაუშვებელი, ხოლო რაც შეეხება კანონში ერთი წინადადების ჩამატებას, რომ კანონი ამოქმედდეს ერთი დღით, ეს არის ჩვეულებრივი იურიდიული ტექნიკა, რომელიც საჭიროა იმისთვის, რომ კანონი გაუქმდეს", — თქვა მსხილაძემ
  • ვეტო უკვე აისახა პრეზიდენტის ადმინისტრაციის ოფიციალურ გვერდზე.

კონტექსტი: 18 მაისს, სალომე ზურაბიშვილმა, მთავრობის მიერ მესამე მოსმენით მიღებულ რუსულ კანონს, ვეტო დაადო: "ეს კანონი არ ექვემდებარება არავითარ ცვლილებას, არავითარ გაუმჯობესებას და ამდენად, არის ძალიან მარტივი ვეტო, ეს კანონი უნდა გაუქმდეს".

  • პრეზიდენტის მოტივირებული შენიშვნები კანონის ამოქმედებიდან მის ერთ დღეში გაუქმებას ითვალისწინებს.

დღეს, 20 მაისს, პარლამენტის თავმჯდომარემ, შალვა პაპუაშვილმა განაცხადა, რომ პარლამენტი, პრეზიდენტის ვეტოს რუსულ კანონზე, შემდეგ სასესიო კვირაში დაძლევს.

  • ქართულ ოცნებას პრეზიდენტის ვეტოს დაძლევა შეუძლია. ამისთვის 76 ხმაა საჭირო, რუსულ კანონს კი უმრავლესობის 84-მა დეპუტატმა დაუჭირა მხარი.