რა ხდება: ქართული ოცნება ეხმიანება კონგრესმენ ჯო უილსონის კანონპროექტს, რომლის მიხედვით, თუ საქართველო შეცვლის ანტიდემოკრატიულ კურსს, აშშ განიხილავს ვიზალიბერალიზაციას, მნიშვნელოვან სამხედრო და სავაჭრო დახმარებას.

• წინააღმდეგ შემთხვევაში კი, კანონის მიმღებ პირებს ინდივიდუალურ სანქციებს დაუწესებენ.
• მმართველი პარტიის პოლიტიკური საბჭოს განცხადებაში კანონპროექტი შეფასებულია, როგორც "ბუნდოვანი პერსპექტივის მქონე დაპირებები და შეურაცხმყოფელი შანტაჟი".

ამ თემაზე ვრცლად: თუ საქართველოს ანტიდემოკრატიული კურსი შეიცვლება, აშშ განიხილავს ვიზალიბერალიზაციას, მნიშვნელოვან სამხედრო და სავაჭრო დახმარებას

დეტალები: ოცნება ანტიდასავლურ განცხადებას აქვეყნებს, სადაც კვლავ ამტკიცებს, რომ საქართველო პოლარიზაციის რეჟიმში ცხოვრობს, რაშიც საკვანძო როლი "გარედან დაფინანსებულ ენჯეოებს აქვთ".

განცხადებაში აღნიშნულია, რომ "ამერიკელი პოლიტიკოსების და ჩინოსნების ნაწილი შეცდომას შეცდომაზე უშვებენ და საქართველოს ისევ შანტაჟის ენით ელაპარაკებიან".

ასევე, განცხადებაში მმართველი პარტია, ამერიკელ მაღალჩინოსნებს კიდევ ერთხელ ადანაშაულებს საქართველოზე თავდასხმაში.

• "საქართველოს ხელისუფლება არ თამაშობს. ჩვენ ვიღებთ ენჯეოების გამჭვირვალობის შესახებ კანონს იმის გამო, რომ ქვეყნის დამშვიდების სხვა შესაძლებლობას ვეღარ ვხედავთ", — წერია განცხადებაში.

აქვე, ქართული ოცნება ამერიკას საპირწონე მიდგომებს სთავაზობს საქართველოს მიმართ და ამბობს, რომ ამ შემთხვევაში, რუსული კანონის მიღება "საჭირო აღარ იქნებოდა".

კონკრეტულად:

"საქართველოს მიმართ ღირსეული დამოკიდებულება სრულიად სხვაგვარად უნდა ყოფილიყო გამოხატული. ამგვარი დამოკიდებულების პირობებში:

• აშშ საქმით დაამტკიცებდა, რომ საქართველოს სტრატეგიული პარტნიორია, კერძოდ, ყოველგვარი პირობების გარეშე, საქართველოს მოქალაქეებს ვიზალიბერალიზაციას მიანიჭებდა და თავისუფალი ვაჭრობის შეთანხმებას გააფორმებდა. როგორც კანონპროექტიდან ირკვევა, აშშ-ს ამის გაკეთება აქამდეც შეეძლო, თუმცა, საქართველოს და ქართველი ხალხის მიმართ გულგრილ დამოკიდებულებას ავლენდა;
• აშშ ჩადებდა ფულს ქართულ ეკონომიკაში, რაც მან ბოლოს 2009-11 წლებში გააკეთა, როდესაც სააკაშვილის რეჟიმი ეკონომიკური კოლაფსისგან იყო გადასარჩენი;
• აშშ უზრუნველყოფდა ენჯეოების ქცევის ცვლილებას, კერძოდ, მათი მხრიდან საქართველოს ხელისუფლების ლეგიტიმაციის არაღიარების პოლიტიკის დასრულებას და რევოლუციური გეგმების გვერდზე გადადებას;
• შეწყდებოდა ევროკავშირის თემის გამოყენება საქართველოს წინააღმდეგ მუდმივი შანტაჟის ინსტრუმენტად, წლის ბოლომდე გაიხსნებოდა მოლაპარაკებები საქართველოსთან, რითაც აღდგებოდა სამართლიანობა უკრაინასთან, მოლდოვასთან და ბოსნია და ჰერცეგოვინასთან მიმართებით", — წერია ოცნების განცხადებაში.

მმართველი პარტია ამბობს, რომ "ამერიკელი პოლიტიკოსების საქართველოზე თავდასხმისა" და "ენჯეოების რევოლუციის მცდელობების" ფონზე, რუსული კანონის მიღებას ალტერნატივა არა აქვს.

"ურთიერთობების თვისებრივად გადალაგება ჩვენს პარტნიორებს მაქსიმუმ ერთ წელიწადში შეუძლიათ. თუ ისინი ამას გააცნობიერებენ, ურთიერთობები ძალიან სწრაფად დალაგდება, მაგრამ თუ საქართველოს მიმართ იგივე მიდგომებით განაგრძობენ მოქმედებას, ამით საქართველოს ინტერესებსაც დააზარალებენ და ამერიკისაც", — წერია ოცნების განცხადებაში.

გაიგე მეტი — POLITICO: კონგრესში შედის კანონპროექტი, რომლის მიხედვით, რუსული კანონის მიღებაზე პასუხისმგებელ პირებს დაეკისრებათ სანქციები