რა ხდება: ვაშინგტონი ხელს მოაწერს საქართველოს ეკონომიკური და უსაფრთხოების მხარდაჭერის ყოვლისმომცველ პაკეტს, თუ საქართველოს მთავრობა შეაჩერებს მზარდ ანტიდასავლურ რიტორიკას.

  • პოლიტიკოს ინფორმაციით, ამის შესახებ ნათქვამია კანონპროექტში, რომელსაც სამხრეთ კაროლინელი რესპუბლიკელი კონგრესმენი, ჯო ვილსონი კონგრესს წარუდგენს.

დეტალები: გარდა იმისა, რომ გამარტივდება ამერიკულ ბაზრებზე ხელმისაწვდომობა, კანონპროექტი საქართველოს მოქალაქეებისთვის სავიზო რეჟიმის ლიბერალიზაციას მოიაზრებს.

  • ის ასევე ავალდებულებს ოფიციალურ პირებს, შეიმუშაონ საქართველოსთვის სამხედრო მხარდაჭერის პაკეტი, რაც რუსული აგრესიისგან ტერიტორიული დაცვისთვის იდეალურ თავდაცვისა და უსაფრთხოების აღჭურვილობას, ასევე — წვრთნებსა და ტექნიკურ უზრუნველყოფას გულისხმობს.

თუმცა, პროგრამა გააქტიურდება მხოლოდ იმ შემთხვევაში, თუ აშშ დაადასტურებს, რომ "საქართველომ აჩვენა მნიშვნელოვანი და მდგრადი პროგრესი დემოკრატიის აღმავლობის მიმართულებით, რაც დასტურდება, მინიმუმ, არსებითად სამართლიანი და თავისუფალი არჩევნებით და დაბალანსებული წინასაარჩევნო გარემოთი“.

დღეს, ასევე, ცნობილი გახდა, რომ უილსონის კანონპროექტი, მოიცავს ინდივიდუალურ სანქციებსაც ქართული ოცნების წევრების მიმართ, რომლებიც მონაწილეობენ რუსული კანონის მიღებაში.

  • კანონპროექტი დააწესებს სავიზო აკრძალვას პოლიტიკოსებისთვის და მათი ოჯახებისთვის, რომლებიც პასუხისმგებელნი არიან რუსულ კანონზე.
  • სანქციები, ასევე, გამიზნული იქნება საქართველოს სამართალდამცავ ორგანოებსა და უშიშროების სამსახურებზე, რომლებიც მშვიდობიანი მანიფესტანტების წინააღმდეგ გამოვიდნენ.
  • დოკუმენტის პირობები, ასევე, ავალდებულებს ამერიკელ მაღალჩინოსნებს, აცნობონ კონგრესს "საქართველოში არასათანადო პოლიტიკური გავლენის, კლეპტოკრატიისა და ელიტური კორუფციის შესახებ“, ასევე რუსეთისა და ჩინეთის სადაზვერვო აქტივების შესახებ, რომლებიც მოქმედებენ ქვეყანაში.