ჩეჩნეთის რესპუბლიკის პარლამენტის თავმჯდომარემ, მაგომედ დაუდოვმა განაცხადა, რომ ის თანამდებობას მოულოდნელად და ახსნა-განმარტების გარეშე ტოვებს.

დაუდოვი ჩეჩნეთის მეთაურის, რამზან კადიროვის ახლო თანამზრახველად მიიჩნეოდა.

"ჩეჩნეთის რესპუბლიკის მეთაურთან, რამზან კადიროვთან შეხვედრის შემდეგ გადავწყვიტე, გადავმდგარიყავი ჩეჩნეთის რესპუბლიკის პარლამენტის თავმჯდომარის თანამდებობიდან“, — განაცხადა მან პარლამენტის სხდომაზე.

დაუდოვმა Telegram-ზე პოსტი გამოაქვეყნა, რომელიც თითქმის მთლიანად კადიროვისადმი სამადლობელი მიმართვაა:

"ძვირფასო ძმაო! გმადლობთ ნდობისთვის მთელი ამ წლების განმავლობაში, შესაძლებლობისთვის, ვყოფილიყავი დიდი ახმატ-ხაჯის გუნდის წევრი, შემეტანა ჩემი თავმდაბალი წვლილი ჩვენი პირველი პრეზიდენტის [კადიროვის მამა, ახმატ კადიროვი] კურსის განხორციელებაში ჩემი ხალხის, რესპუბლიკისა და ჩვენი დიდი სამშობლოს — რუსეთის საკეთილდღეოდ!“ — წერს ის.

დაუდოვს "ერთად გატარებული წლებისთვის", თავის მხრივ, კადიროვმაც გადაუხადა მადლობა.

"მაგრამ დღეს მაგომედ ხოჟახმედოვიჩმა გადაწყვიტა, რომ ის აღარ უნდა დარჩეს ამ თანამდებობაზე", — წერს კადიროვი და აღნიშნავს, რომ დაუდოვმა უნდა გამოიყენოს თავისი ”ლიდერის ნიჭი” სხვა სფეროებში.

კადიროვმა, დაუდოვის შემცვლელად, 69 წლის შაიდ ჟამალდაევის არჩევის შესახებ განაცხადა:

"დღეს ჩვენი ძვირფასო და პატივცემული შაიდ ჟამალდაევი, ჩეჩნეთის რესპუბლიკის პირველი პრეზიდენტის, ახმატ-ჰაჯი კადიროვის მოკავშირე არჩეულ იქნა ჩეჩნეთის რესპუბლიკის პარლამენტის ახალ თავმჯდომარედ", — წერს იგი. "შაიდ ვახაევიჩი, როგორც გამოცდილი მენეჯერი, ადვილად გაართმევს თავს დაკისრებულ მოვალეობებს".

ჟამალდაევი 2016 წლიდან პარლამენტის ვიცე-სპიკერის თანამდებობას იკავებდა, მანამდე კი მას პრესის მინისტრისა და რესპუბლიკის მეთაურის თანაშემწის პოსტები ეკავა.

"ჟამალდაევი ერთ-ერთი ყველაზე ვეტერანი პოლიტიკოსია რეგიონში“, — თქვა ჰაროლდ ჩემბერსმა, ჩრდილოეთ კავკასიაზე ორიენტირებულმა პოლიტიკური და უსაფრთხოების ანალიტიკოსმა OC Media-სთან.

მისი განცხადებით, დაუდოვის გადადგომა, შესაძლოა, რუსეთში უფრო ფართო ცვლილებების ნაწილი იყოს.

"ვფიქრობ, დაუდოვის გადადგომა, სავარაუდოდ, იმ ფართო ცვლილების ნაწილია, რომელშიც ქვეყანა ომის დროს დგება, როგორც უკრაინასთან, ასევე ისლამურ სახელმწიფოსთან მიმართებაში. კადიროვის ჯანმრთელობასთან/მემკვიდრეებთან კავშირი შესაძლებელია, მაგრამ ვფიქრობ, რომ სხვა ნაბიჯებიც უნდა გადაიდგას, რომ ეს კავშირი დავინახოთ”, — თქვა მან.

დაუდოვი რამზან კადიროვის და "ახმატ კადიროვის გზის" ერთ-ერთი უახლოესი თანამოაზრეა.

დაუდოვმა, რომელსაც ხშირად უწოდებდნენ კადიროვის მარჯვენა ხელს, წამყვანი როლი ითამაშა პოლიტიკური ბლოგერებისა და ოპოზიციური მოღვაწეების დევნაში. ტუმსო აბდურახმანოვმა, ბლოგერმა, რომელიც გადაურჩა რამდენიმე მკვლელობის მცდელობას, პირადად გამოუცხადა სისხლით მტრობა, 2019 წელს.

დაუდოვი, ასევე, ჩართული იყო ჩეჩნეთიდან უკრაინაში გასაგზავნი მებრძოლების მომზადებაში; ომის დაწყებიდან ხელმძღვანელობდა რეგიონის ოპერატიული შტაბს.

მას სანქციები დაუწესეს აშშ-მა, დიდმა ბრიტანეთმა და პოლონეთმა, უკრაინის წინააღმდეგ ომში მონაწილეობის, ასევე, ქვიარ ადამიანების დევნისა და ადამიანის უფლებების სხვა დარღვევების გამო.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.