იურიდიულ საკითხთა და თვითმმართველობის საპარლამენტო კომიტეტებმა პრეზიდენტის მოტივირებული შენიშვნებს, ადგილობრივი თვითმმართველობისა და საარჩევნო კოდექსის შესახებ მხარი არ დაუჭირეს. საკითხის განხილვას პარლამენტი ხვალ რიგგარეშე სესიის ფორმატში გააგრძელებს.

კომიტეტის სხდომაზე პრეზიდენტის მოტივირებული შენიშვნები საპარლამენტო მდივანმა ანა დოლიძემ წარადგინა.

საპარლამენტო უმრავლესობის დეპუტატები მიიჩნევენ, რომ პრეზიდენტის პოზიციას არგუმენტაცია აკლდა და არ ეთანხმებიან პრეზიდენტს, რომ პარლამენტის მიერ მიღებული კანონები ქვეყანაში დემოკრატიის ხარისხს გააუარესებს.

იურიდიულ საკითხთა კომიტეტის თავმჯდომარე, ეკა ბესელია მიიჩნევს, რომ პრეზიდენტის შენიშვნებში წარმოდგენილი არ არის პრინციპული საკითხები, ყველა საკითხი არის ტექნიკური ხასიათის:

"პრინციპული რაც იყო ის ჩვენ ოპოზიციის სასარგებლოდ დავთმეთ, ეს არის ძალიან დიდი ბონუსი, რომელიც ეძლევა ოპოზიციას, როდესაც მათი მერობის კანდიდატები იქნებიან პროპორციულ სიაშიც".

კომიტეტების დასრულების შემდეგ ანა დოლიძემ განაცხადა, რომ კომიტეტებმა ხელიდან გაუშვეს შესაძლებლობა ამ საკითხზე კიდევ ერთხელ დაფიქრებულიყვნენ იმ შესაძლო, ნეგატიურ შედეგებზე, რომლებიც ამ ცვლილებებს მოჰყვება:

"ვეტოს არგუმენტებზე შინაარსობრივი მსჯელობის მაგივრად, ვისაუბრეთ იმაზე, თუ რატომ იყენებს პრეზიდენტი ვეტოს უფლებას".

20 ივლისს, საქართველოს პრეზიდენტმა შვიდ თვითმმართველი ქალაქის გაუქმებას ვეტო დადო. საქართველოს პარლამენტმა შვიდი თვითმმართველი ქალაქის - გორის, ამბროლაურის, მცხეთის, ოზურგეთის, თელავის, ახალციხისა და ზუგდიდის მუნიციპალიტეტებთან გაერთიანების დადგენილება რამდენიმე კვირის წინ მიიღო. დადგენილების პროექტს პარლამენტის 85-მა დეპუტატმა დაუჭირა მხარი, 10 კი წინააღმდეგი იყო. იმავე დღეს, პრეზიდენტმა საარჩევნო კოდექსში შესატან ცვლილებებსაც ვეტო დაადო. ცვლილებებით, საარჩევნო ადმინისტრაციაში პარტიების მიერ წევრების დანიშვნა დამოკიდებული იქნება პარტიის მიერ ბოლო საპარლამენტო არჩევნებში მიღებული ხმების რაოდენობაზე.