რა ხდება: გზის გადაკეტვა და სხვა ფიზიკური საშუალებების გამოყენება, რომელიც მიმართულია ტრანსპორტის მოძრაობის შეფერხებისკენ, შეკრების თავისუფლების ფარგლებში ექცევა.

  • ამის შესახებ ნათქვამია საქართველოს ახალგაზრდა იურისტთა ასოციაციის (საია) განცხადებაში.

დეტალები: ამ ნორმას, მათი თქმით, ადამიანის უფლებათა ევროპული სასამართლო განმარტავს.

"ასევე, გზის გადაკეტვა შეკრების თავისუფლების ფარგლებს შესაძლოა გასცდეს იმ შემთხვევაში, როდესაც ადგილი აქვს ნორმალური ცხოვრებისა და სხვების მიერ განხორციელებული კანონიერი ქმედებებისთვის ხელის იმგვარ შეშლას, რომელიც მნიშვნელოვნად აღემატება საჯარო ადგილას შეკრების უფლების რეალიზების შედეგად გამოწვეულ შეფერხებას", — ნათქვამია საია-ს განცხადებაში.

  • მათივე განმარტებით, როდესაც დემონსტრაციას ძალადობრივი ხასიათი არ აქვს, სახელმწიფომ უნდა გამოიჩინოს მიმღებლობა დემონსტრაციის შედეგად გამოწვეული შეფერხებების მიმართ, რაც შეიძლება, მათ შორის, ტრანსპორტის მოძრაობის შეფერხებაში გამოიხატოს.

"აქედან გამომდინარე, გმირთა მოედანზე მიმდინარე აქციის დაშლა საპოლიციო ძალების მიერ წარმოადგენს აქციის მონაწილეების შეკრების თავისუფლებაში უკანონო ჩარევას, ხოლო ამ მიზნით განხორციელებული ადმინისტრაციული დაკავებები - არაპროპორციულ საშუალებას.

  • მოვუწოდებთ შინაგან საქმეთა სამინისტროს: არ დაარღვიოს მშვიდობიანი დემონსტრანტების შეკრების და მანიფესტაციის უფლება; შეწყვიტოს ადმინისტრაციული დაკავებები და მისცეს მათ პროტესტის გამოხატვის საშუალება.
  • მოვუწოდებთ პოლიციელებს: არ დაემორჩილონ უკანონო ბრძანებებს", — წერია საია-ს განცხადებაში.

კონტექსტი: გმირთა მოედანზე ტრანსპორტის მოძრაობა გადაკეტილია.

  • პოლიციამ აქციის მონაწილეების დაშლა სცადა, არიან დაკავებულებიც.
  • თუმცა მოგვიანებით, ხალხის ნაკადი გმირთა მოედნისკენ რუსთაველიდან დაიძრა და ამ დროისთვის, მოედანზე დიდი რაოდენობით მანიფესტანტები არიან მობილიზებული.