ენმ-ს წევრმა, გიგა ბოკერიამ გადაცემა ინტერVIEW-ს ჟურნალისტის შეკითხვას, რატომ უჩნდება ენმ-ს პროტესტი, როდესაც საზოგადოების ნაწილი უნდობლობას უცხადებს ნაციონალურ მოძრაობას იმ ფონზე, როდესაც საქართველოს მოქალაქეებმა იხილეს ციხეში ძალადობის ფაქტები და რამდენიმე დღის წინ გამოქვეყნდა კვლევის შედეგიც, თუ რა ხდებოდა ენმ-ს მმართველობის პერიოდში პენიტენციურ სისტემაში, უპასუხა:

"არანაირი პროტესტი არ მიჩნდება, როდესაც მოქალაქეები ან თუნდაც ჟურნალისტები, თუნდაც არაკომპეტენტურად ან მიკერძოებულად სვამენ კითხვებს, რადგან ეს პროცესი დემოკრატიის ნაწილია. მე პროტესტი მიჩნდება მხოლოდ პოლიტიკურ დევნაზე, პოლიტიკურ პატიმრებზე და ძალადობაზე, რომელსაც ადგილი აქვს 4 წლის განმავლობაში პოლიტიკური ფიგურების წინააღმდეგ და იმაზე, რაც ქვეყანაში ხდება, საით მიყავს ივანიშვილის რეჟიმს ქვეყენა".

ენმ-ს წევრმა განაცხადა, რომ იმ ფონზე, რაც საქართველოში ენმ-ს ხელისუფლების სათავეში მოსვლის დროს კრიმინალის კუთხით ხდებოდა, ნაციონალური მოძრაობის მიერ ჩატარებულმა რეფორმებმა გვერდითი ეფექტის გაჩენა გამოიწვია, რამაც საბოლოო ჯამში პატიმრების დიდი რაოდენობა მოგვცა შედეგად.

ბოკერიას განმარტებით, იმას, ვინ უნდა დარჩეს პოლიტიკურ ცხოვრებაში და ვინ არა, წყვეტს ამომრჩეველი:

"2012 წელს ამომრჩეველმა გადაწყვიტა რომ ივანიშვილის პარტიისთვის მიენდო საქართველოს ბედი. 2016 წელს ეს გადაწყვეტილება ხელახლა მიიღება და დარწმუნებული ვარ იმ კატასრტროფის მერე, რაც რაც ჩვენ 4 წლის განმავლობაში მივიღეთ, ივანიშვილის რეჟიმი დაასრულდება".