მოკლედ: დღეს, 30 აპრილს, 19:00 საათზე, პარლამენტის წინ ისევ გაიმართება რუსული კანონის საწინააღმდეგო აქცია. ამის შესახებ ნათქვამია ფეისბუქზე, პროტესტის საორგანიზაციო გვერდზე.

  • საორგანიზაციო ჯგუფის განცხადებაში აღნიშნულია, რომ რუსული კანონის მეორე მოსმენა სავარაუდოდ, კენჭისყრისთვის, მეორე დღეს, 1-ელ მაისსაც გასტანს. "ამდენად, 30-ში ვიწყებთ მეორე მოსმენით კანონის მიღების გაპროტესტებას", — აცხადებენ ისინი.

კონტექსტი: საპარლამენტო უმრავლესობა დღეს შეეცდება, მეორე მოსმენით დაუჭიროს მხარი რუსულ კანონს პლენარულ სხდომაზე.

  • ამის შესახებ პარლამენტის ბიუროს დღევანდელ სხდომაზე გახდა ცნობილი, რომელიც პარლამენტის თავმჯდომარის პირველმა მოადგილემ, გია ვოლსკიმ ჩაატარა.
  • პლენარული სხდომა უკვე მიმდინარეობს.

აქციის ორგანიზატორების მიმართვა: "კვლავ ვაპროტესტებთ რუსულ კანონს. რუსული კანონი გვაშორებს ევროპას!

  • საქართველოს მოქალაქეების მკაფიოდ გამოხატული ნება, საქართველო გახდეს ევროკავშირის სრულყოფილი წევრი, დასაცავია!
  • საქართველოს მოქალაქეებო, დავდგეთ ერთად და ხელი შევუშალოთ საქართველოს რუსეთიზაციას. ვანახოთ ხელისუფლებას, რომ ძალა ჩვენშია, ძალა ხალხშია, უნდა მოგვისმინონ! არა რუსულ კანონს!"