მოკლედ: ლაზარე გრიგორიადისი თავისუფალია. მან გლდანის ციხე სულ რამდენიმე წუთის წინ დატოვა.

ციხესთან მას ოჯახის წევრები, გულშემატკივრები და მედიის წარმომადგენლები დახვდნენ.

ფოტო: მარიამ მერლანი / On.ge

  • გრიგორიადისის შეწყალების აქტი პრეზიდენტმა სალომე ზურაბიშვილმა დღეს, 24 აპრილს გამოსცა.

დეტალები: 19 აპრილს ცნობილი გახდა, რომ მოსამართლე ზვიად შარაძემ, ლაზარე გრიგორიადისის საქმეზე, განაჩენის სარეზოლუციო ნაწილის მოსამზადებლად, 14-დღიანი ვადა აიღო.

  • მაშინ ბითაძემ On.ge-ის უთხრა, რომ მოსამართლეს, კანონით, 14-დღიანი ვადის აღების უფლება აქვს იმ შემთხვევაში, თუ "საქმე მოცულობითია".
  • განაჩენის სარეზოლუციო ნაწილის მომზადების შემდეგ, პრეზიდენტს შეუძლია, შეწყალების ოქმი გამოსცეს.

წინაისტორია: ლაზარე გრიგორიადისს 12 აპრილს, 9-წლიანი პატიმრობა მიესაჯა.

  • განაჩენის გამოცხადების შემდეგ, ლაზარეს დედამ და ადვოკატმა, პრეზიდენტ სალომე ზურაბიშვილს შეწყალების თხოვნით მიმართეს.
  • 12 აპრილს, სალომე ზურაბიშვილმა განაცხადა, რომ გრიგორიადისს შეიწყალებს.

ლაზარეს საქმის ქრონოლოგია: რუსული კანონის საწინააღმდეგო აქციის მონაწილე, ლაზარე გრიგორიადისი პოლიციამ 2023 წლის 29 მარტს დააკავა.

  • 31 მარტს სასამართლომ ლაზარე გრიგორიადის აღკვეთის ღონისძიების სახით პატიმრობა შეუფარდა.
  • 8 აპრილს გრიგორიადისისთვის პატიმრობის გირაოთი შეცვლის მოთხოვნა სააპელაციომ დაუშვებლად ცნო და ლაზარე პატიმრობაში დატოვა.
  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავებულს ბრალდება პოლიციელის ჯანმრთელობის ხელყოფისა და ცეცხლის წაკიდებით სხვისი ნივთის დაზიანების მუხლებით წარედგინა.
  • დანაშაული 7-დან 11 წლამდე პატიმრობას ითვალისწინებს.

2023 წლის 25 სექტემბერს ლაზარე გრიგორიადისს 2021 წელს მომხდარი ოჯახური ძალადობის საქმეზე 1 წლითა და 6 თვით თავისუფლების აღკვეთა მიუსაჯა. საუბარია მამის, ბექა გრიგორიადისის დაჭრაზე.

  • ამ თემაზე ლაზარეს მამას არაერთხელ უსაუბრია — ამბობდა, რომ შვილთან პრეტენზია არ აქვს.