რუსთავი 2-ის გენერალური დირექტორი, ნიკა გვარამია საგანგებო განცხადებას აკეთებს და განმარტავს, რომ რუსთავი 2-ის ინფორმაციით, მოსამართლე შორენა ყაველაშვილი, რომელიც რუსთავი 2-ის საქმის განმხილველი კოლეგიის წევრია, სააპელაციო სასამართლოს თავჯდომარის, ვალერი ცერცვაძის მიერ პირადად არის მიმაგრებული კოლეგიისთვის იმ მიზნით, რომ მან ნებისმიერ გადაწყვეტილებას მოაწეროს ხელი. ამასთან, გვარამიას განმარტებით, ყაველაშვილი არის არა სამოქალაქო, არამედ სისხლის სამართლის პალატის მოსამართლე:

"ის არის ზონდერი და დავალების შემსრულებელი და ის ვერ გაუწევს თავისი კვალიფიკაციით ამ სფეროში საკმაოდ კვალიფიციური, დარჩენილი ორი მოსამართლის ნაზღაიძის და გუჯაბიძის პოზიციებს საქმესთან დაკავშირებით. შესაბამისად, ჩვენ ვაყენებთ მოსამართლე ყაველაშვილის აცილების საკითხს. კეთილი ინებოს კოლეგიამ გამოვიდეს სათათბიტოდან და პირველ რიგში გამოაცხადოს თავისი გადაწყვეტილება ამ საკითხთან დაკავშირებით".

გვარამიას ასევე ამბობს, რომ ზემოაღნიშნულის დამადასტურებელია ისიც, რომ სასამართლო პროცესზე ყაველაშვილი ჩუმად იჯდა და არცერთი შეკითხვა არ გასჩენია მანამ, სანამ მისი აცილების შუამდგომლობა დადგებოდა:

"ჩვენ გვაქვს ეჭვი, რომ ეს მოსამართლე სისხლის სამართლის პალატიდან მოავლინეს სწორედ იმიტომ, რომ დავალების შემსრულებელი მესამე მოსამართლე იყო საჭირო კოლეგიაში. ჩვენ ვსვამთ კითხვას, რის საფუძველზე არ მონაწილეობდა ამ დავაში ნაზღაიძე-გუჯაბიძის მყარი შემადგენლობის მესამე მოსამართლე ქეთევან მესხიშვილი ან ბატონი გოდერძიშვილი. რის საფუძველზე ჩანაცვლდა ეს მოსამართლეები შორენა ყაველაშვილით, თან იმ მოსამართლით, რომელიც არ წარმოადგენს სამოქალაქო პალატას, წარმოადგენს სისხლის სამართლის პალატას და რომელსაც ამავდროულად არ გააჩნია მოსამართლის კვალიფიკაციის დამადასტურებელი საბუთი".

გვარამიამ განმარტა, რომ იუსტიციის უმაღლესი საბჭოს პასუხი, რომ ყაველაშვილმა იუსტიციის უმაღლეს სკოლაში 18 თვიანი კურსები სამოქალაქო სამართალში გაიარა, სრული აბსურდია, რადგან, აღნიშნულ კურსებს იუსტიციის უმაღლეს სკოლაში ყველა გადის:

"მოსამართლის გამოცდები, სპეციფიკური კვალიფიკაციით ტარდება სწორედ იმის გამო, რომ შემოქმდეს მოსამართლის კვალიფიკაცია სწორედ ამ მიმართულებით და მას მიენიჭოს პრიორიტეტი მუშაობისა სწორედ ამ მიმართულებით. ყაველაშვილი მოსამართლეობამდე იყო თუ არ ვცდები სიღნაღის პროკურორი. ისმის კითხვა, ჰქონდა თუ არა სასამართლოს უფლება რომ ის კოლეგიისთვის მიემაგრებინა, დიახ, ამ უფლებას კანონმდებლობა იცნობს, ეს უფლება გამოიყენება იმ შემთვევაში, როცა სასამართო გადატვირთულია და ადგილი არ აქვს განსაკუთრებული მნიშვნელოვანი და სამართლებრივად რთული სამოქალაქო საქმებს,სადაც კოლეგიის ყველა წევრის აზრი უნდა იყოს მაქსიმალურად კვალიფიციური".