რა ხდება: ირანმა ისრაელის წინააღმდეგ ათობით დრონი გაუშვა.

  • ამის შესახებ Axios-ს აშშ-ის და ისრაელის ოთხმა ოფიციალურმა პირმა განუცხადა.

  • ეს არის თეირანის პასუხი 1 აპრილს, სირიის დედაქალაქ დამასკოს ცენტრში მდებარე ირანის დიპლომატიურ კომპლექსზე განხორციელებულ საჰაერო თავდასხმაზე, რომლის შედეგად ლიკვიდირებულ იქნენ ირანის ისლამური რევოლუციის გვარდიის კორპუსის (IRGC) მაღალი რანგის მეთაურები.

რატომ არის ეს მნიშვნელოვანი: ეს არის პირველი შემთხვევა, როდესაც ირანმა თავდასხმა ისრაელზე საკუთარი ტერიტორიიდან დაიწყო.

  • უცნობია, რა არის მათი სამიზნე.
  • The Times of Israel წერს, რომ დრონებს, ისრაელის ტერიტორიამდე მისასვლელად რამდენიმე საათი დასჭირდება.

აშშ-ს მაღალჩინოსნები შეშფოთებულები არიან, რომ ისრაელის პასუხი ირანის წინააღმდეგ ახალ ესკალაციას გამოიწვევს რეგიონში.

ბაიდენის ადმინისტრაციამ პირობა დადო, რომ დაეხმარება ისრაელს ირანის თავდასხმისთვის წინააღმდეგობის გაწევაში.

დეტალები: ირანის მიერ დრონების გაშვება დაადასტურა ისრაელმაც. თავდაცვის ძალების (IDF) სპიკერმა დანიელ ჰაგარიმ თქვა, რომ ისრაელი აკონტროლებს საფრთხეს.

ისრაელელი მაღალჩინოსნის თქმით, ირანმა, მათი მიმართულებით, ასობით დრონი გაუშვა.

  • ჰაგარიმ თქვა, რომ IDF ამუშავებს თავდაცვის გეგმას აშშ-ის ცენტრალურ სარდლობასთან და რეგიონში სხვა პარტნიორებთან ერთად, რათა დრონები ისრაელის ტერიტორიაზე შეღწევამდე გაანადგურონ.

"ჩვენი თავდაცვითი სისტემები მზადყოფნაშია; ჩვენ მზად ვართ ნებისმიერი სცენარისთვის, როგორც თავდაცვითი, ასევე შეტევითი კუთხით", — თქვა ისრაელის პრემიერ-მინისტრმა, ბენიამინ ნეთანიაჰუმ.