ქართველმა მომღერალმა და ამერიკული ვოისის ნახევარფინალისტმა, Nini Iris-მა, ახალი სინგლი გამოუშვა. Psycho მუსიკოსის საავტორო სიმღერაა, კომპოზიციის პროდიუსერი კი მეთ კიარავალი გახლავთ.

"იმედი მაქვს, ისევე მოგეწონებათ ეს სიმღერა, როგორც მე მომწონს", — წერს Nini Iris.

შემსრულებელთან და პროდიუსერთან ერთად, სიმღერაზე გრემის ნომინანტმა მასტერინგის ინჟინერმა, ჯო ლამბერტმა, იმუშავა. სინგლის გარეკანის ილუსტრაცია კი ქართველ მხატვარს, მარიამ ჭელიძეს, ეკუთვნის.

Nini Iris, რომლის ნამდვილი სახელი ნინი ბრეგვაძეა, გასულ წელს ამერიკულ ვოისში მონაწილეობდა. "ბრმა ქასთინგზე" სიმღერის შესრულების შემდეგ, ნინის ოთხივე მწვრთნელი ოვაციებით შემოუტრიალდა. ირლანდიელმა პოპვარსკვლავმა ნაილ ჰორანმა, რომელიც ნინიმ მოგვიანებით თავის მენტორად აირჩია, ქართველ მუსიკოსს "პოტენციური გამარჯვებული" უწოდა. Nini Iris პროექტს ნახევარფინალიდან გამოეთიშა, მაგრამ მან ამერიკელი ტელემაყურებლის დიდი მხარდაჭერა დაიმსახურა.

ნინი ბრეგვაძე საქართველოდან ნიუ-იორკში საცხოვრებლად და მუსიკალური კარიერის გასაგრძელებლად 2016 წელს გადავიდა. მუსიკოსის თქმით, უცხო ქვეყანაში თავის დასამკვიდრებლად გრძელი და რთული გზა გაიარა.

მანამდე, 2015 წელს, 18 წლის მომღერალი ქართული X ფაქტორის მეორე სეზონში გამოჩნდა და კონკურსის ფინალისტიც გახდა. გამორჩეული ვოკალური შესაძლებლობების მქონე მუსიკოსმა, რომელიც, ამავდროულად, ცეკვავდა და რეპავდა, მეგაშოუს ჟიური და მაყურებელი ერთნაირად აღაფრთოვანა.

Psycho-ის გარდა, ნინის გამოშვებული აქვს კიდევ ორი სინგლი: Rhythm Of My Heartbeat (2019) და Fade Away (2022).

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...