რა ხდება: მას შემდეგ, რაც ცნობილი გახდა, რომ სასამართლომ მიუსაჯა 9-წლიანი პატიმრობა რუსული კანონის საწინააღმდეგო აქციის მონაწილეს, ლაზარე გრიგორიადისს, მისი ოჯახი აცხადებს, რომ აპირებენ, ლაზარეს შეწყალების მოთხოვნით პრეზიდენტ ზურაბიშვილს მიმართონ.

  • სალომე ზურაბიშვილს ლაზარეს შეწყალების მოთხოვნით, პეტიციითაც მიმართავენ.
  • ინიციატორია მოძრაობა სირცხვილია.
  • პეტიციაზე ხელმოწერა შესაძლებელია ელექტრონულად, ამ ბმულზე

დეტალები: ორგანიზაცია აღნიშნავს, რომ ქართული საზოგადოებისათვის, გასული 12 წლის გამოცდილებით, ცხადია, თუ რამდენად პოლიტიზებულია სასამართლო შტო.

მათი შეფასებით,

  • სასამართლოს გადაწყვეტილებები პოლიტიკური საქმეების შესახებ, ემორჩილება მმართველი პარტიის სურვილებს, "რასაც კიდევ ერთხელ და მეტისმეტად აშკარად ადასტურებს აშშ-ის მიერ იმ სამი მოქმედი და ერთი ყოფილი მოსამართლის სანქცირება, რომლებსაც ე.წ სასამართლო კლანის შემქმნელებად და წევრებად იცნობს ქართული საზოგადოება".
  • იმის გათვალისწინებით, რომ "ყველა სახელისუფლებო შტო და დემოკრატიული ინსტიტუტი ქართული ოცნების მიერაა მიტაცებული, ერთადერთი, ვისაც აწ უკვე 22 წლის ლაზარე გრიგორიადისის პატიმრობიდან დახსნა შეუძლია, საქართველოს პრეზიდენტია."

მოძრაობა სირცხვილია: "მივმართავთ სალომე ზურაბიშვილს: თუკი თქვენთვის მნიშვნელოვანია საქართველოს პროევროპული კურსი და დასავლური ღირებულებები, უნდა უზრუნველყოთ, რომ 2023 წლის მარტის აქციების გამარჯვება გამარჯვებად დარჩეს, ლაზარე გათავისუფლდეს და მისი სახით ჩვენი ქვეყნის ევროპული მომავლისათვის ბრძოლას კიდევ ერთი მძევალი არ შეეწიროს მსხვერპლად.

  • გთხოვთ და მოგიწოდებთ, დაეხმაროთ ქართულ საზოგადოებას ევროპულ ღირებულებებზე დაფუძნებული ქვეყნის შენებაში — შეიწყალეთ 1 წლის განმავლობაში უსაფუძვლოდ და უსამართლოდ პატიმრობაში მყოფი ლაზარე გრიგორიადისი."

ლაზარეს საქმესთან დაკავშირებულ სიახლეებს გაეცანით აქ

ამავე თემაზე: "ერთადერთ ნათელ წერტილად და იმედად პრეზიდენტი გვრჩება" — ლაზარეს დედის, თამთა კალანდაძის ოპ-ედი