მოკლედ: პარლამენტის თავმჯდომარეს, ცენტრალური საარჩევნო კომისიის (ცესკო) თავმჯდომარის ვაკანტური თანამდებობის დასაკავებლად გიორგი კალანდარიშვილის, ხოლო ცესკო-ს წევრობის თანამდებობაზე — მაია ზარიძის, გიორგი შარაბიძის და გია ცაცაშვილის კანდიდატურები წარედგინა.

  • ინფორმაციას საქართველოს პარლამენტი ავრცელებს.
  • გადაწყვეტილება პარლამენტში გამართული ცესკოს თავმჯდომარეობის და წევრობის კანდიდატების შესარჩევ საკონკურსო კომისიის სხდომაზე მიიღეს.

კომისიას სამი წევრი გამოეთიშა

კომისია 9 წევრისგან შედგებოდა.

მათ შორის იყვნენ არასამთავრობო ორგანიზაციების და აკადემიური სექტორის წარმომადგენლები და ასევე, საქართველოს პრეზიდენტის წარმომადგენელი.

  • პარლამენტის პრესსამსახურის ინფორმაციით, მათგან ორი ორგანიზაციის წარმომადგენლის სურვილი იყო, კომისიის მუშაობა უცხოური გავლენის გამჭვირვალობის შესახებ კანონპროექტის განხილვამდე გადადებულიყო, თუმცა კომისიამ ეს თხოვნა არ გაიზიარა.
  • მიზეზად "შემჭიდროებული ვადები "დასახელდა.
  • ამიტომ კომისიის წევრებმა, ნინო ჩხობაძემ და ზაურ ხალილოვმა კომისიის მუშაობაში მონაწილეობა არ მიიღეს.

მათ სოლიდარობა გამოუცხადა ასევე, საქართველოს პრეზიდენტის წარმომადგენელმა ლევან შენგელიამაც.

პარლამენტის თავმჯდომარის მიერ შესარჩევი კონკურსი გამოცხადებული იყო ცესკო-ს თავმჯდომარის და ცესკო-ს წევრობის სამ ვაკანტურ თანამდებობაზე.

  • ცესკო-ს თავმჯდომარის თანამდებობის დასაკავებლად განაცხადი საკონკურსო კომისიას გიორგი კალანდარიშვილმა წარუდგინა,
  • ხოლო ცესკო-ს წევრობის 3 ვაკანტურ თანამდებობაზე განცხადებები ლუხუმ ბურჯალიანმა, მაია ზარიძემ, გიორგი შარაბიძემ და გია ცაცაშვილმა წარადგინეს.
  • კომისიის წევრებმა სხდომაზე ვაკანტური თანამდებობის დასაკავებლად წარმოდგენილ ყველა კანდიდატს მოუსმინეს, მათ ცესკოს მუშაობასთან დაკავშირებით საკუთარი ხედვები წარადგინეს.