რა ხდება: ლაზარე გრიგორიადისის დედა, თამთა კალანდაძე სალომე ზურაბიშვილს შვილის შეწყალების თხოვნით მიმართავს.

  • ამის შესახებ მან განაჩენის გამოცხადების შემდეგ თქვა.

დეტალები: თამთა კალანდაძეს იმედი აქვს, რომ პრეზიდენტი ლაზარეს შეიწყალებს.

  • "აქამდე ამაზე გვისაუბრია, რომ თუ იქნებოდა გამამტყუნებელი განაჩენი, მივმართავდით ქალბატონ სალომე ზურაბიშვილს, აქედან პირდაპირ მივდივართ მასთან.
  • სალომე ზურაბიშვილთან უშუალო კომუნიკაცია არ მქონია, მაგრამ ქალბატონ პრეზიდენტს ძალიან ბევრმა მიაწოდა ინფორმაცია ლაზარეზე, ინფორმირებულია და ვიმედოვნებ, რომ ლაზარეს შეიწყალებს", — თქვა თამთა კალანდაძემ მთავართან.

განაჩენის გამოცხადებას დღეს თავად ბრალდებულიც დაესწრო, თუმცა დედასთან საუბრის საშუალება არ ჰქონია.

"უბრალოდ, ერთმანეთს კოცნები გავუგზავნეთ. კი ველოდი [განაჩენს], მაგრამ მაინც სანერვიულოა ეს ამბავი და ლაზარესაც, სავარაუდოდ, ასეთი განცდა ექნება, მაგრამ ჩვენ ყველანაირად ვეცდებით, რომ ლაზარე დავიხსნათ ამათი კლანჭებიდან", — თქვა თამთა კალანდაძემ.

ამ თემაზე ნახეთ: ერთადერთ ნათელ წერტილად და იმედად პრეზიდენტი ზურაბიშვილი გვრჩება — ლაზარეს დედა

კონტექსტი: მოსამართლე ზვიად შარაძემ დღეს, 12 აპრილს, ლაზარე გრიგორიადისი დამნაშავედ ცნო და 9-წლიანი პატიმრობა მიუსაჯა.

  • განაჩენის გამოცხადებას თავად ბრალდებულიც ესწრებოდა.

ფოტო: მარიამ მერლანი / On.ge

ლაზარეს საქმის ქრონოლოგია: რუსული კანონის საწინააღმდეგო აქციის მონაწილე, ლაზარე გრიგორიადისი პოლიციამ 2023 წლის 29 მარტს დააკავა.

  • 31 მარტს სასამართლომ ლაზარე გრიგორიადის აღკვეთის ღონისძიების სახით პატიმრობა შეუფარდა.
  • 8 აპრილს გრიგორიადისისთვის პატიმრობის გირაოთი შეცვლის მოთხოვნა სააპელაციომ დაუშვებლად ცნო და ლაზარე პატიმრობაში დატოვა.
  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავებულს ბრალდება პოლიციელის ჯანმრთელობის ხელყოფისა და ცეცხლის წაკიდებით სხვისი ნივთის დაზიანების მუხლებით წარედგინა.
  • ეს მუხლი 7-დან 11 წლამდე პატიმრობას ითვალისწინებს.

2023 წლის 25 სექტემბერს ლაზარე გრიგორიადისს 2021 წელს მომხდარი ოჯახური ძალადობის საქმეზე 1 წლითა და 6 თვით თავისუფლების აღკვეთა მიუსაჯა. საუბარია მამის, ბექა გრიგორიადისის დაჭრაზე.

  • ამ თემაზე ლაზარეს მამას არაერთხელ უსაუბრია — ამბობდა, რომ შვილთან პრეტენზია არ აქვს.