მოკლედ: საქართველოს პარლამენტთან აქცია დაიწყო, სახელწოდებით — არა რუსულ კანონს, თავისუფლება ლაზარეს.

  • პარლამენტის უკანა შესასვლელთან, საიდანაც შენობაში შედიან პარლამენტის წევრები, მოქალაქეები და სამოქალაქო აქტივისტები არიან შეკრებილი.

დეტალები: დღეს უმრავლესობა პარლამენტში ხელახლა იწყებს რუსულ კანონთან დაკავშირებულ პროცედურებზე მუშაობას.

  • პარალელურად, თბილისის საქალაქო სასამართლოში გაიმართება ლაზარე გრიგორიადისის საქმეზე დასკვნითი პროცესიც.
  • პარლამენტის შენობის შესასვლელთან მობილიზებულია პოლიცია.
პოლიცია პარლამენტის შესასვლელთან

პოლიცია პარლამენტის შესასვლელთან

ფოტო: მარიამ მერლანი / On.ge

კონტექსტი: 3 აპრილს, ქართული ოცნების აღმასრულებელმა თავმჯდომარემ და უმრავლესობის ლიდერმა, მამუკა მდინარაძემ, განაცხადა, რომ ოცნება ისევ აპირებს, "უცხო აგენტად" გამოაცხადოს დამოუკიდებელი მედიასაშუალებები, რომელთა შემოსავლის 20%-ზე მეტის წყარო "უცხოური ძალაა", ანუ საგრანტო პროექტებია.

  • მდინარაძის თქმით, "კანონპროექტი საქართველოს პარლამენტში დაინიცირდება ზუსტად იმავე ტექსტით, როგორც შარშან იყო".
  • გასული, 2023 წლის მარტში ანალოგიური კანონპროექტის ინიციირებას საზოგადოება პარლამენტის წინ აპროტესტებდა, სამართალდამცავებმა კი ისინი რამდენჯერმე დაშალეს წყლის ჭავლის, წიწაკის სპრეისა და ცრემლსადენი გაზის გამოყენებით.
  • შემდეგ, მძლავრი საზოგადოებრივი წინააღმდეგობის ფაქტორის გამო, მმართველმა პარტიამ კანონპროექტი ჩააგდო.