მოკლედ: უკრაინაში, ზაპოროჟიეს ატომურ ელექტროსადგურზე დრონებით თავდასხმა განხორციელდა.

  • სპეციალისტები ამბობენ, რომ მსხვილი ბირთვული ავარიის რისკი გაიზარდა.

დეტალები: რუსეთის მტკიცებით, თავდასხმა უკრაინამ განახორციელა, უკრაინა კი ამ ინფორმაციას უარყოფს.

  • გაეროს ატომური ენერგიის საერთაშორისო სააგენტომ (IAEA) არაერთხელ გააკეთა განცხადება საფრთხის შესახებ, რომელიც, შესაძლოა, ასეთ თავდასხმებს მოჰყვეს.
  • IAEA-ს ხელმძღვანელმა რაფაელ გროსიმ თქვა, რომ კვირას უპილოტო თვითმფრინავის თავდასხმა იყო "უგუნური" და ბირთვული უსაფრთხოება რისკის ქვეშ დადგა.

ობიექტმა ელექტროენერგიის გამომუშავება შეწყვიტა 2022 წელს, მაგრამ სჭირდება ელექტროენერგიის მუდმივი მიწოდება მისი ერთ-ერთი რეაქტორის გასაგრილებლად, რომელიც სრულად არ არის გათიშული.

  • IAEA-მ, რომელსაც ჰყავს ექსპერტთა ჯგუფი ზაპოროჟიაში, დაადასტურა "დრონების შეტევის ფიზიკური ზემოქმედება“ სადგურის ერთ-ერთ რეაქტორზე.
  • სადგურის რუსეთის მიერ დანიშნულმა ადმინისტრაციამ განაცხადა, რომ რადიაციის დონე ნორმალურია და თავდასხმას სერიოზული ზიანი არ მოჰყოლია.
  • IAEA-ს თქმით, "ეს არის სერიოზული ინციდენტი, რომელსაც შეუძლია, დაარღვიოს რეაქტორის შეკავების სისტემის მთლიანობა".

ზაპოროჟიას ქარხანა, რომელიც სამხრეთ უკრაინაში მდებარეობს, ყველაზე დიდია ევროპაში. რუსულმა ძალებმა ის 2022 წლის თებერვალში, სრულმასშტაბიანი შეჭრის დაწყებიდან მალევე დაიკავეს და მას შემდეგ ოკუპირებული აქვთ.

  • გასულ თვეს IAEA-მ განაცხადა, რომ ქარხნის ექსპერტების ჯგუფს, ერთი კვირის განმავლობაში, ყოველ დღე ესმოდა აფეთქებების ხმა.
  • "უკვე ორ წელზე მეტია, რაც უკრაინაში ბირთვული უსაფრთხოება მუდმივ საფრთხეშია. ჩვენ ვცდილობთ, გავაკეთოთ ყველაფერი, რაც შეგვიძლია, რათა მინიმუმამდე დავიყვანოთ ბირთვული ავარიის რისკი, რომელმაც შეიძლება ზიანი მიაყენოს ადამიანებს და გარემოს, არა მხოლოდ უკრაინაში“, — თქვა მაშინ გროსიმ.