მოკლედ: დაძაბულობაა ადიგენის შესასვლელთან, ადგილობრივი მართლმადიდებლები და სასულიერო პირები შეიკრიბნენ და მუსლიმებს არ მისცეს საშუალება, მისულიყვნენ იუსუფ მიქელაძის სახლში, სადაც ისინი პარასკევის ლოცვას აღავლენენ.

დეტალები: მედიის თანახმად, ადიგენის მერი, გოჩა ქიმაძე მუსლიმ თემთან შესახვედრად პროტესტის დაწყებიდან 3 საათის შემდეგ მივიდა.

დაბა ადიგენი — 5 აპრილი, 2024 წელი

დაბა ადიგენი — 5 აპრილი, 2024 წელი

ფოტო: TOK TV

შინაგან საქმეთა სამინისტრო აცხადებს, რომ ისინი დაბა ადიგენში, უსაფრთხოების დაცვის მიზნით, მობილიზებულები არიან:

  • "მოვუწოდებთ ადგილზე შეკრებილ მოქალაქეებს, არ გასცდნენ გამოხატვის თავისუფლებისა და შეკრების კანონით დადგენილ ნორმებს. სამართალდარღვევის ნებისმიერი ფაქტი პოლიციის მხრიდან, კანონის ფარგლებში, დაუყოვნებლივ იქნება აღკვეთილი", — აცხადებს უწყება.

წინაისტორია: ადიგენში, მართლმადიდებლებსა და მუსლიმებს შორის დაპირისპირება მარტშიც მოხდა. 8 მარტს, მათი დაპირისპირების მიზეზი იუსუფ მიქელაძის სახლი იყო, სადაც ბოლო წლებია, ადიგენში მცხოვრები მუსლიმები იკრიბებიან და პარასკევის ლოცვას აღავლენენ.

  • საპროტესტო აქციის მონაწილეები ამბობდნენ, რომ სახლის, სადაც მედრესეა (მუსლიმანური სასწავლებელი), "მეჩეთად გადაქცევას" და იქ ყოველ პარასკევს ლოცვის ჩატარებას არ დაუშვებდნენ.
  • იუსუფ მიქელაძის სახლთან შეკრებილთა შორის იყვნენ სასულიერო პირებიც.
  • გავრცელებულ ვიდეო კადრებში ჩანდა თუ როგორ მიმართავს ერთ-ერთი სასულიერო პირი შენობაში მყოფ პირს.
  • "გამოდი, გამოეთრე გარეთ", "გაგიხევ სახეს, დედას ვფიცავარ თუ არ დაგტოვო კოჭლი", — ისმის ვიდეოში.

გამოხმაურებები: მომხდარ ფაქტს, 9 მარტს, სახალხო დამცველი გამოეხმაურა და განაცხადა, რომ "მიუღებელია ნებისმიერი სახის ძალადობა და კონსტიტუციით გარანტირებული რელიგიური თავისუფლების შეზღუდვა".

ასევე, სოციალური სამართლიანობის ცენტრმა (SJC) სახელმწიფოს რელიგიური თანასწორობის და სოციალური მშვიდობის დასაცავად, ქმედითი ნაბიჯების გადადგმისკენ მოუწოდა.

  • SJC-ის მიხედვით, ქართველი მუსლიმი თემი უკვე 10 წელზე მეტია ფიზიკური, სოციალური და სიმბოლური ძალადობის, დისკრიმინაციისა და შევიწროების გამოცდილებებს აწყდება.

მომხდარს გამოეხმაურა სამოქალაქო პლატფორმა არა-ფობიას, ის წერდა, რომ გამოძიება არ დაწყებულა, მიუხედავად იმისა, რომ იუსუფ მიქელაძის სახლთან გადაღებულ ვიდეო-მასალაში ჩანდა შესაძლო დანაშაულის ნიშნები:

  • სისხლის სამართლის კოდექსი, მუხლი 151 — მუქარა;
  • მუხლი 155— რელიგიური წესის აღსრულებისთვის უკანონოდ ხელშეშლა;
  • და მუხლი 156 — დევნა.