მოკლედ: რუსეთის მიერ ოკუპირებულ, თვითგამოცხადებულ ცხინვალში, ე.წ. საგარეო საქმეთა ყოფილმა მინისტრმა, დიმიტრი მედოევმა განაცხადა, რომ რუსეთის წინააღმდეგ საქართველოსგან "მეორე ფრონტის" გახსნის ალბათობა "დაბალია".

  • გამოცემა სოვას თანახმად, ამის შესახებ მან ისაუბრა კონფერენციაზე — საკავშირო სახელმწიფო მრავალპოლარულ სამყაროში.

დეტალები: ამასთან, მან გაიმეორა პრორუსული რიტორიკა, რომ საქართველოს ხელისუფლების "ნათესაური ლოიალობა" არ გამორიცხავს დასავლეთის მცდელობას, აიძულოს თბილისი, გახსნას მეორე ფრონტი მოსკოვის წინააღმდეგ. ამავე შინაარს ავრცელებს ქართული ოცნება დასავლეთზე საუბრისას მას შემდეგ, რაც ვლადიმირ პუტინმა დაიწყო რუსეთის სრულმასშტაბიანი ომი უკრაინაში, 2022 წლის თებერვალში.

  • მედოევი მიიჩნევს, რომ იმ შემთხვევაში, თუ არ შეიცვლება საქართველოში ხელისუფლება 2024 წლის საქართველოს საპარლამენტო არჩევნების შედეგად და სხვა პოლიტიკური ძალები არ მოვლენ ხელისუფლებაში, თბილისის პოზიცია რუსეთის ფედერაციის მიმართ არ გახდება "უარესი და მტრული".

კომენტარი: "საქართველოში მომავალი საპარლამენტო არჩევნების მნიშვნელობა, რომელიც მიმდინარე წლის 24 ოქტომბერს არის დაგეგმილი, აშკარაა — თუ მათი შედეგების მიხედვით, პარტია ქართული ოცნება ხელისუფლებაში დარჩება, საქართველოს დღევანდელ საგარეო პოლიტიკას აქვს შანსი, იგივე დარჩეს, ან, ყოველ შემთხვევაში, არ გაუარესდეს და გახდეს უფრო მტრულად განწყობილი რუსეთის მიმართ", — განაცხადა მან.

კონტექსტი — რა გვახსოვს მედოევზე: ე.წ. საგარეო საქმეთა მინისტრობისას, 2019-ში მან ისაუბრა იმის შესახებ, რომ "სამხრეთ ოსეთს არაფერი აქვს საერთო საქართველოსთან და არ აპირებს, გახდეს მისი ნაწილი."

  • მაშინ ასე გამოეხმაურა აშშ-ის, ევროკავშირისა და ნატო-ს განცხადებებს ოკუპირებულ ცხინვალში ჩატარებული ე.წ. საპარლამენტო არჩევნების არაღიარების შესახებ: "მათ არ სურთ, დაიჯერონ, რომ 1989 წლიდან სამხრეთ ოსეთს საქართველოსთან საერთო არაფერი აქვს და არანაირ გარემოებებში არ აპირებს, გახდეს მისი ნაწილი. მატარებელმა დიდი ხნის წინ ჩაიარა."
  • და დამატებით აღნიშნა, რომ გააგრძელებენ სვლას მთავარი მიზნისკენ — "დამოუკიდებელი და დემოკრატიული სახელმწიფოს შენებისკენ."
  • გარდა ამისა, 2019 წელს მან ინტერვიუ მისცა დაბალტირაჟიან გერმანულ რადიკალურ-მემარცხენე გამოცემას ნოიეს დოიჩლანდს და განაცხადა, რომ ყაზბეგი "ისტორიულ აღმოსავლეთ ოსეთს წარმოადგენს. ეს სამხრეთ ოსეთის რესპუბლიკის უმაღლესი ხელმძღვანელობის მკაფიო პოზიციაა და თრუსო, კობი და გუდოს ხეობა, ადრე თუ გვიან, ოსეთს დაუბრუნდება".

ბოლო ხაზი: საქართველოს მოქმედ ხელისუფლებას აქამდეც უწონებდნენ ცხინვალში "სიფრთხილესა" და "პრაგმატიზმს"; აფხაზეთი ასევე დარწმუნებულია, რომ თბილისი "არ დათანხმდება" "მეორე ფრონტის" გახსნას.