ბასიანი: კანონი სრულად ზღუდავს გამოხატვისა და შეკრების თავისუფლებას, აწესებს ცენზურას ფაქტობრივად ყველა სფეროზე

28 Mar. 2024, 23:37

ვეხმაურებით მავნებლურ საკონსტიტუციო ცვლილებებს, ე.წ "ლგბტ პროპაგანდის" ამკრძალავი კანონის შესახებ, რომელიც პირველად რუსეთში შეიქმნა და მას შემდეგ, მისი მიღება მხოლოდ რამდენიმე ქვეყანაში გახდა შესაძლებელი, რომელსაც ულტრამემარჯვენე, ფაშისტური მთავრობები მართავენ.

ჰომოფობიური ინიციატივა წარმოადგენს პირდაპირ, აგრესიულ შეტევას ქვიარ ადამიანებზე, რომლებიც წლების განმავლობაში განიცდიან ინსტიტუციონალიზებულ ზეწოლას პოლიტიკური და რელიგიური ისტებლიშმენტის მიერ, რომლებიც ხელოვნურად აღვივებენ კონფლიქტებს, საზოგადოებრივი ჯგუფების დაყოფისა და ამ გზით, მათზე სრული კონტროლის მოპოვების მიზნით. ეს არის ხელისუფლების ამაო მცდელობა, ჩაახშოს ყველა კრიტიკული ხმა.

კანონი სრულად ზღუდავს ადამიანის ფუნდამენტურ უფლებებს, მათ შორის, გამოხატვისა და შეკრების თავისუფლებას, აწესებს ცენზურას საჯარო და თავისუფალი სახელოვნებო საქმიანობის ფაქტობრივად ყველა სფეროზე; საფრთხე ემუქრება საკლუბო კულტურას, ქვიარ წვეულებებსა და ბოლო წლების განმავლობაში შექმნილ დრეგ კულტურას, რომელიც თანამედროვე ქართული ალტერნატიული კულტურის მონაპოვარია.

საზოგადოებრივი მორალისა და ოჯახის ღირებულებების დაცვის მოტივით ამ კანონის მიღება არის პოპულისტური აბსურდი. ქართულ საზოგადოებას, და მოწყვლად ჯგუფებს დღეს დაცვა სჭირდებათ პირველ რიგში უთანასწორო, გულგრილი და არაადამიანური სოციალური და ეკონომიკური პოლიტიკისგან, რომელმაც მოსახლეობის უდიდესი ნაწილი ტანჯვისთვის გაწირა და ქვეყნიდან გაქცევა აიძულა, და რომლის შემქმნელიც არის დღეს ჩვენს ქვეყანაში არსებული პოლიტიკური კლასი.

მარტის აქციები, როდესაც ხალხის რისხვამ ხელისუფლებას რუსული კანონის მიღების შესაძლებლობა არ მისცა, გაკვეთილი უნდა იყოს მათთვის, ვინც მუდმივად ცდილობს, უგულებელყოს ჩვენი მტკიცე და ურყევი მიზანი, შექმნას თავისუფლებაზე, თანასწორობასა და სოლიდარობის იდეებზე დაფუძნებული საზოგადოება.

ხელისუფლება კიდევ ერთხელ ცდილობს, ქვეყნის პოლიტიკური და კულტურული გარემო რუსულ რეპრესიულ მეთოდებს დაუქვემდებაროს. მოვუწოდებთ ხელისუფლებას და პარლამენტის წევრებს, უარი თქვან საკონსტიტუციო ცვლილების მიღებასა და განხორციელებაზე, რომლის მიღებას, გვჯერა, რომ ჩვენი საზოგადოება არ დაუშვებს.

იმედი გვაქვს, საზოგადოება უკომპრომისოდ დაუდგება ქვიარ ადამიანებს გვერდში ამ მძიმე დროს და გამოხატავენ სოლიდარობას, რომელიც ახლაც, როგორც ყოველთვის, ყველაზე დიდი ძალაა რეპრესიული სისტემის შესაჩერებლად.

ბოლო ამბები:

კომენტარები

კვირის ტოპ-5

გირჩევთ

ახლა კითხულობენ

საქართველოს ბანკის YouTube პროექტი — ფორმაში გრძელდება — უყურეთ მეორე ეპიზოდს