მოკლედ: რუსეთის უშიშროების ფედერალურმა სამსახურმა (FSB) გაავრცელა განცხადება, რომელშიც ნათქვამია, რომ მოსკოვში, კროკუს სითი ჰოლზე მომხდარ თავდასხმაში მონაწილე ტერორისტები უკრაინის საზღვრის გადაკვეთას გეგმავდნენ და მათ უკრაინულ მხარეს ჰყავდათ "კონტაქტები".

  • უკრაინამ მათ განცხადებას აბსურდი უწოდა.

დეტალები: უკრაინის სამხედრო დაზვერვის სამმართველოს სპიკერმა, ანდრიი იუსოვმა, განუცხადა BBC-ს, რომ უკრაინასთან სასაზღვრო ზონა სავსეა სპეცსამსახურების თანამშრომლებითა და ჯარისკაცებით.

ასევე, ბოლო დროს განვითარებული მოვლენების გათვალისწინებით — ბელგოროდსა და კურსკში, სადაც სამხედრო მოქმედებები მიმდინარეობდა — "ეს ფრონტის ხაზია".

  • "თუ ეჭვმიტანილები უკრაინის მიმართულებით მიდიოდნენ, ისინი ან სულელები იყვნენ, ან — თვითმკვლელები", — თქვა მან.

წუხელ, უკრაინის სამხედრო დაზვერვამ განაცხადა, რომ თავდასხმა მოსკოვის მიერ დაგეგმილი ოპერაცია იყო, რათა ამაში უკრაინა დაედანაშაულებინათ, მომხდარიყო ომის ესკალაცია და მობილიზაციისთვის უფრო მეტი მხარდაჭერა ჰქონოდათ ქვეყანაში.

რა ვიცით ტერაქტზე: თავდასხმა საკონცერტო დარბაზში გუშინ, 22 მარტს მოხდა.

  • კონცერტის დაწყებისას პარტერში შეიარაღებული პირები შეიჭრნენ და ცეცხლი გახსნეს.
    შემდეგ კი ისროლეს ყუმბარები.
  • ამ დროის მონაცემებით, დაიღუპა, სულ მცირე, 143 ადამიანი, დაშავდა 100-ზე მეტი.
  • შენობაში გაჩენილი ხანძრის ლოკალიზებას მეხანძრეები მთელი ღამის განმავლობაში ცდილობდნენ.
  • მომხდარზე პასუხისმგებლობა ისლამურმა სახელმწიფომ აიღო.

ნახეთ ყველაფერი, რაც მოსკოვში მომხდარ ტერაქტზე ვიცით.