მოკლედ: ერთიანი ნაციონალური მოძრაობის წევრი სოფო ჯაფარიძე აცხადებს, რომ მიხეილ სააკაშვილის გათავისუფლების მოთხოვნით ხელმოწერების შეგროვება სრულდება და მომავალ კვირას, "ასობით ათასი" ადამიანის ხელმოწერას, პრეზიდენტ სალომე ზურაბიშვილს წარუდგენენ.

  • "ქალბატონო სალომე, ნუ დაგვიმახინჯებთ ქვეყნის ისტორიას, უპირობოდ უნდა გაათავისუფლოთ მიხეილ სააკაშვილი და უნდა გაითვალისწინოთ იმ ქვეყნის ასობით ათასი ადამიანის პოზიცია, რომელი ქვეყნის პრეზიდენტიც ხართ თქვენ", — თქვა სოფო ჯაფარიძემ.

დეტალები: ჯაფარიძემ აღნიშნა, რომ დღეს, 23 მარტს, ხელმოწერებს ბოლნისში აგროვებს, სადაც "ადამიანები რიგებში დგანან, რომ ხელი მოაწერონ მიხეილ სააკაშვილის გათავისუფლების მოთხოვნას".

  • "საქართველოში, სადაც ყოველთვის ტრადიციულად ძალიან ჭირს ნებისმიერ თემაზე ხელმოწერების შეგროვება, ეს იყო უპრეცედენტო შემთხვევა და მიხეილ სააკაშვილის გათავისუფლების მოთხოვნამ გააერთიანა ასობით ათასი ადამიანი", — განაცხადა სოფო ჯაფარიძემ.
  • მისივე თქმით, ხელმომწერებს შორის არიან ადამიანები, რომლებიც აქამდე მიხეილ სააკაშვილის და ერთიანი ნაციონალური მოძრაობის მხარდამჭერები არ იყვნენ.
  • "აქ დგანან სახელმწიფო მოხელეები, ის ადამიანები, რომლებიც აქამდე არ იყვნენ ჩვენს რიგებში და ითხოვენ მიხეილ სააკაშვილის უპირობო გათავისუფლებას".

კონტექსტი: 16 თებერვალს სოფო ჯაფარიძემ განაცხადა, რომ ერთიანი ნაციონალური მოძრაობა სააკაშვილის გათავისუფლების მიზნით, ქვეყნის მასშტაბით, ხელმოწერების შეგროვებას იწყებდა.

  • შეგროვებული ხელმოწერები პარტიას 1-ელ მარტს, 15:00 საათზე, პრეზიდენტ სალომე ზურაბიშვილისთვის უნდა გადაეცა.

გაიგე მეტი: "ჩემი გათავისუფლებისთვის ასი ათასზე მეტი ხელმოწერა შეგროვდა" — მიხეილ სააკაშვილი