მოკლედ: ერთიანი ნაციონალური მოძრაობა აცხადებს, რომ დღეიდან, 16 თებერვლიდან, პარტია და მიხეილ სააკაშვილის "ასობით ათასი მხარდამჭერი" , სააკაშვილის გათავისუფლების მიზნით, ხელმოწერების შეგროვებას იწყებენ ქვეყნის მასშტაბით.

  • ამის შესახებ პარტიის წევრმა, სოფო ჯაფარიძემ განაცხადა.

დეტალები: ჯაფარიძის თქმით, შეგროვებულ ხელმოწერებს გადასცემენ პრეზიდენტ სალომე ზურაბიშვილს 1-ელ მარტს, 15:00 საათზე, რაც "ძალიან დიდი ნაბიჯი იქნება მიხეილ სააკაშვილის თავისუფლებისთვის".

  • ჯაფარიძე აცხადებს, რომ დროა, ზურაბიშვილმა მიიღოს ისტორიული გადაწყვეტილება, გაათავისუფლოს პოლიტიკური პატიმრობიდან მიხელ სააკაშვილი:
  • "მაშინ, როცა ჩვენი ევროპელი პარტნიორები დიდი ყურადღებით აკვირდებიან ქართულ პოლიტიკას. მაშინ, როცა ქართველ ხალხთან ერთად, მსოფლიოს მრავალი ქვეყნის ლიდერი მოუწოდებს ხელისუფლებას დასრულდეს მესამე პრეზიდენტის პოლიტიკური პატიმრობა, ზურაბიშვილმა ყველაზე კარგად იცის, თუ ვის ემსახურება მიხეილ სააკაშვილის პოლიტიკური პატიმრობა — მხოლოდ მტრის ინტერესებს და ეს არის ერის ღირსების შელახვა", — განაცხადა ჯაფარიძემ.
  • მისივე თქმით, საქართველოს უახლოეს ისტორიაში მალე დადგება მომენტი, როდესაც ქართველმა ხალხმა სინათლესა და სიბნელეს შორის არჩევანი უნდა გააკეთოს.

ბოლო ხაზი: სოფო ჯაფარიძის თქმით, ხელმოწერების შეგროვებაში აქტიურად იქნებიან ჩართულები ენმ-ს რაიონული ორგანიზაციები, რომლებიც კოორდინაციაში დაეხმარებიან.