მოკლედ: საქართველოს საფეხბურთო ნაკრებმა დინამო არენაზე ლუქსემბურგის ნაკრები ანგარიშით — 2:0 დაამარცხა.

  • გოლები: 1:0 ზივზივაძე (40), 2:0 ზივზივაძე (63)

დეტალები: თამაშის 55-ე წუთზე, საქართველოს ნაკრების მიერ გატანილი პირველი გოლის შემდეგ, ლუქსემბურგის ნაკრებმა ანგარიში გაათანაბრა, თუმცა, მსაჯმა გოლი გააუქმა და ლუქსემბურგის ნაკრების მცველი, მაქსიმე შანო, შეტევის წინ დაშვებული სიუხეშის გამო, მოედნიდან გააძევა.

  • თამაშის დასრულების შემდეგ, ლუქსემბურგის ნაკრების მწვრთნელმა, ლუკ ჰოლცმა, საქართველოს გამარჯვება მიულოცა, მსაჯების მიმართ კი პრეტენზიები გამოთქვა: "სრულიად არ მესმის, რის საფუძველზე გადაწყვიტა მეორე ტაიმში ჩვენი გოლის გაუქმება მსაჯმა, გადამწყვეტ მომენტში", — თქვა მან.

ბუდუ ზივზივაძე, რომლის დუბლითაც საქართველოს ნაკრებმა წარმატება მოიპოვა, ამბობს, რომ ამაყია გუნდის თამაშით და აღნიშნავს, რომ დაწყებულ საქმეს ბოლომდე მიიყვანენ: "ძალიან ბედნიერი ვარ, რადგან საქართველოს ნაკრებმა ჩემი გოლებით გაიმარჯვა, თუმცა ეს მხოლოდ ჩემი დამსახურება არ არის."

  • ფეხბურთელმა ასევე, აღნიშნა, რომ გერმანიაში ყოფნა ფიზიკურ მომზადებაში ძალიან დაეხმარა. ის თამაშობს გერმანიის მეორე ბუნდესლიგის გუნდ კარლსრუეში, სადაც, მიუხედავად მცირე სათამაშო დროისა, გოლების ორნიშნა მაჩვენებელი უკვე დააფიქსირა.

რას ნიშნავს ეს საქართველოს ნაკრებისთვის: ამ გამარჯვების შემდეგ, საქართველოს ნაკრები ევრო 2024-ის პლეი ოფის ფინალში ითამაშებს.

  • 2024 წლის 26 მარტს საქართველოს ფინალური მატჩი ექნება საბერძნეთის ნაკრებთან;
  • საბერძნეთის ნაკრებმა ყაზახეთის ნაკრები დაამარცხა ანგარიშით — 5:0
  • საბერძნეთთან გამარჯვების შემთხვევაში, საქართველოს ნაკრები ევროპის ჩემპიონატის ფინალში პირველად გავა.
  • ევროპის ჩემპიონატი გაიმართება გერმანიაში, ამ ზაფხულს.

ბოლო ხაზი: ცნობილია, რომ ფინალურ მატჩში საქართველოს ნაკრებში ხვიჩა კვარაცხელია ითამაშებს. მას არ მისცეს ლუქსემბურგთან მატჩისას თამაშის უფლება, ყვითელი ბარათების დისკვალიფიკაციის გამო.