რა ხდება: საქართველოს პროკურატურის და ისრაელის სამართალდამცავთა ერთობლივი მონაწილეობით, ბათუმში მდებარე ხელოვნური განაყოფიერების, დონაციის და სუროგაციის ცენტრ BIRTH-ში საგამოძიებო და საპროცესო მოქმედებები ჩატარდა.

• პროკურატურის ინფორმაციით, შუამდგომლობა სამართლებრივი დახმარების აღმოჩენის შესახებ ისრაელიდან შემოვიდა.

დეტალები: სამართალდამცველებმა სამედიცინო კლინიკიდან დოკუმენტაცია და ელექტრონული ინფორმაცია ამოიღეს.

• "ამ ეტაპზე, საერთაშორისო გამოძიების ფარგლებში, საგამოძიებო და საპროცესო მოქმედებები გრძელდება, მათ შორის დაგეგმილია საქართველოს და ისრაელის მოქალაქეების მოწმის სახით გამოკითხვა", — წერია პროკურატურის განცხადებაში.

რა არის ცნობილი საქმეზე: ისრაელური მედია წერს, რომ ისრაელში საქართველოდან შეიტანეს განაყოფიერებული კვერცხუჯრედები. ემბრიონები შეიცავდნენ ჰემოფილია B-ის გენს.

• მედია წერს, რომ გამოძიება ისრაელის პოლიციამ და ჯანდაცვის სამინისტრომ რამდენიმე თვის წინ დაიწყეს.
• გამოძიებამ, რომელიც თელ-ავივში მიმდინარეობდა, გამოავლინა, რომ ინ ვიტრო განაყოფიერების ორი კლინიკის თანამშრომლებმა, გენეტიკური დაავადების მატარებელი ემბრიონები საქართველოდან შეიტანეს.
• მათ, სავარაუდოდ, ამის შესახებ იცოდნენ, თუმცა მაინც გადაიტანეს რამდენიმე ისრაელელი ქალის საშვილოსნოში.
• საქმეზე ორი ექიმია დაკავებული.
• თუ რომელი კლინიკები იყო ჩართული თაღლითობაში, საჯაროდ არ დაუსახელებიათ.

ისრაელის ჯანდაცვის სამინისტროს მიერ ორშაბათს, 18 მარტს გამოქვეყნებული ინფორმაციის თანახმად, საქმე სამინისტროში შიდა გამოძიებით დაიწყო, როდესაც მიიღეს ინფორმაცია იმის შესახებ, რომ დონორის კვერცხუჯრედები, რომლებიც ატარებენ ჰემოფილია B-ს გენეტიკური მუტაციას, განაყოფიერდნენ საქართველოში, კლინიკა BIRTH-ში და შემდეგ ისრაელში შეიტანეს.

• ჰემოფილიით დაავადებულ ადამიანებში სისხლდენის შეჩერება დიდი ხნის განმავლობაში ვერ ხერხდება. საშიში სისხლდენა შეიძლება განვითარდეს შინაგანად, სახსრებსა და კუნთებში, ან გარეგანად, მცირე ჭრილობების, სტომატოლოგიური პროცედურების, ტრავმის ან ქირურგიული ჩარევის შედეგად.

მედიის ინფორმაციით, დაავადებული ემბრიონების შესახებ იცოდნენ საქართველოს კლინიკაში მომუშავე ექიმებმაც.

• ისრაელის ჯანდაცვის სამინისტრომ გასცა ბრძანება, ქართული კლინიკიდან განაყოფიერებული კვერცხუჯრედების იმპორტის დაუყოვნებლივ შეჩერების შესახებ.

ბოლო ხაზი: ებრაული მედიის ცნობით, ამ დრომდე ოფიციალური საჩივარი პოლიციაში ოთხმა ქალმა შეიტანა, მათ შორის ერთმა ჰემოფილიით დაავადებული ბავშვი გააჩინა, და მეორემ კი ორსულობის 20 კვირის ვადაზე იმშობიარა, ბავშვი გარდაცვლილი იყო.