მოკლედ: დღეს, 18 მარტს, ნატოს გენერალური მდივანი იენს სტოლტენბერგი საქართველოს პრეზიდენტს სალომე ზურაბიშვილს ორბელიანების სასახლეში შეხვდა.

დეტალები: პრეზიდენტის ადმინისტრაციის მიხედვით, საუბარი შეეხო უკრაინაში მიმდინარე ომს, რუსეთის აგრესიას და საერთაშორისო პარტნიორებისა და თანამეგობრობის მხრიდან, უკრაინის მიმართ სოლიდარობის მნიშვნელობასა და საჭიროებას.

  • "უკრაინის ომისა და რუსეთის აგრესიული ქმედებების გამო რეგიონში გაზრდილი საფრთხეების ფონზე, მხარეებმა ხაზი გაუსვეს შავი ზღვის უსაფრთხოების მნიშვნელობას".
  • შეხვედრისას საუბარი შეეხო საქართველოს ოკუპირებულ რეგიონებში რუსეთის ფედერაციის საპრეზიდენტო არჩევნების ჩატარებას, რაზეც, ადმინისტრაციის მიხედვით, პრეზიდენტმა აღნიშნა, რომ "ეს უხეშად ლახავს საქართველოს სუვერენიტეტსა და ტერიტორიულ მთლიანობას და სრულად ეწინააღმდეგება საერთაშორისო ნორმებს".

პირისპირ შეხვედრის შემდეგ, მხარეებმა აუდიენცია გაფართოებული შემადგენლობით გამართეს. ნატოს გენერალურმა მდივანმა საპატიო წიგნში ჩანაწერიც გააკეთა.

  • პრეზიდენტთან შეხვედრამდე, იენს სტოლტენბერგი საქართველოს პრემიერ მინისტრს ირაკლი კობახიძეს შეხვდა, სადაც ერთობლივი განცხადებები გააკეთეს.

გაიგე მეტი: რაზე ილაპარაკა იენს სტოლტენბერგმა — აქცენტები

ბოლო ხაზი: ნატოს გენერალური მდივანი ხვალ, 19 მარტს, საქართველოდან ერევანში გაემგზავრება, სომხეთის პრეზიდენტსა და პრემიერ-მინისტრთან შესახვედრად.