მოკლედ: არასამთავრობო ორგანიზაციების ნაწილი მოუწოდებს ხელისუფლებას, შეწყვიტოს მოსამართლეების კეთილსინდისიერებასთან დაკავშირებით განსხვავებული აზრის მქონე მოსამართლეების დისკრედიტაციის კამპანია.

• განცხადებას ხელს 12 ორგანიზაცია აწერს.

დეტალები: განცხადებაში აღნიშნულია, რომ

• სასამართლო სისტემის რეფორმა, ევროკავშირში გაწევრიანებისთვის მოცემული 9 დათქმის ერთ-ერთი პირობაა.
• ევროკომისია მიგვითითებს, რომ უნდა შეიქმნას საგანგებო სისტემა, რათა შემოწმდეს კანდიდატებისა და სასამართლო სისტემაში წამყვან თანამდებობებზე დანიშნული პირების კეთილსინდისიერება.

დეტალურად: რა წერია ევროკომისიის 9 დათქმაში მართლმსაჯულების შესახებ

არასამთავრობოების შეფასებით, საქართველოს ხელისუფლების წარმომადგენლებმა ამ პირობის მიმართ მკვეთრად უარყოფითი პოზიცია დააფიქსირეს და არაერთხელ თქვეს, რომ მოსამართლეების კეთილსინდისიერების შემოწმების საჭიროებას ვერ ხედავენ.

• "აღნიშნული ინიციატივის წინააღმდეგ განცხადება გააკეთა უზენაესმა სასამართლომაც, თუმცა, როგორც მოგვიანებით გაირკვა, საკითხთან დაკავშირებით სასამართლო სისტემაში ერთგვაროვანი დამოკიდებულება არ არსებობს", — წერია განცხადებაში.

არასამთავრობოების ცნობით, ორმა მოსამართლემ — ეკატერინე გასიტაშვილმა და ნინო ბაქაქურმა, კეთილსინდისიერების შემოწმების საგანგებო მექანიზმის ამოქმედების თაობაზე, უზენაესი სასამართლოს პლენუმის განცხადებას მხარი არ დაუჭირეს და საჯაროდ განაცხადეს ამის შესახებ.

• "მსგავსი მოსაზრება დააფიქსირეს პირველი და მეორე ინსტანციის სხვა მოსამართლეებმაც. მოსამართლეები აცხადებენ, რომ არ სურთ, გახდნენ საქართველოს ევროპული მომავლის შემაფერხებელი ფაქტორი, შესაბამისად, მზად არიან გაიარონ კეთილსინდისიერების გადამოწმების ტესტი", — აღნიშნავენ სამოქალაქო სექტორის წარმომადგენლები.

მათივე თქმით:

მოსამართლეთა განცხადებების შემდეგ, ხელისუფლებამ განსხვავებული აზრის მქონე მოსამართლეების წინააღმდეგ მადისკრედიტირებელი კამპანია წამოიწყო.

• პრემიერ-მინისტრმა უარყოფით კონტექსტში მოიხსენია ერთ-ერთი მოსამართლე, რომელიც განსხვავებულ პოზიციებს აფიქსირებს ხოლმე მიმდინარე მოვლენებზე.
• განსხვავებული აზრის მქონე მოსამართლეები ასევე უარყოფით კონტექსტში მოიხსენიეს პარლამენტის წევრებმა ბექა ოდიშარიამ და დავით მათიკაშვილმა.
• "აღნიშნული ქმედებით ხელისუფლების წარმომადგენლებმა კიდევ ერთხელ აჩვენეს, რომ პოლიტიკური ხელისუფლებისთვის მიუღებელია სასამართლოში კრიტიკული, პრინციპული მოსაზრებები", — ვკითხულობთ განცხადებაში.

სტრიქონებს შორის: ბაქაქურსა და გასიტაშვილზე საუბრისას, პრემიერ-მინისტრმა, ირაკლი კობახიძემ თქვა:

"მე მგონია, რომ ამ ორიდან მინიმუმ ერთს აქვს კეთილსინდისიერების პრობლემა, გამომდინარე იქიდან, რომ სათანადო ვადებში არ განიხილავს საქმეებს, ზარმაცობს. თუ იქნებოდა საუბარი კეთილსინდისიერების შემოწმებაზე, საკუთარი უნდა შეემოწმებინათ ასეთ მოსამართლეებს და ისინი სხვის კეთილსინდისიერებაზე არ უნდა საუბრობდნენ, მაგრამ ეს არის მაქსიმუმი, რა განცხადების გაკეთებასაც ვაპირებ სასამართლოსთან დაკავშირებით. ეს არის დამოუკიდებელი შტო. არც ჩემი და არავის საქმე არ არის კეთილსინდისიერების შემოწმება".

ასევე, ნახეთ: ევროპისკენ სვლა ირაკლი კობახიძის პირობებში? — რას ველოდოთ

არასამთავრობოები აცხადებენ, რომ აღმასრულებელი ხელისუფლების მეთაურის თავდასხმა სასამართლო სისტემაში განსხვავებული აზრის მქონე მოსამართლეზე, საქმეთა გაჭიანურების საფუძვლით, განსაკუთრებით პრობლემურია.

• კერძოდ, მათი განცხადებით, საქმეთა ჭარბი რაოდენობა და გაჭიანურება მთელი სასამართლო სისტემის პრობლემაა.
• მისი მოგვარება კი, უპირველესად, სასამართლო ხელისუფლების პასუხისმგებლობაა, თუმცა, ნაცვლად პრობლემის გადაჭრისა, საქმეთა ჭარბი ნაკადი და ამით გამოწვეული განხილვის გაჭიანურება მოსამართლეებზე ზეწოლის ბერკეტად გამოიყენება.

ამ თემაზე: გაჭიანურებული სასამართლო პროცესები — პრობლემა, რომელსაც ყველა აღიარებს

"მოვუწოდებთ ხელისუფლებას, შეწყვიტოს განსხვავებული აზრის მქონე მოსამართლეების დისკრედიტაციის კამპანია, სრულყოფილად შეასრულოს ევროკავშირის პირობები, რაც არის არა მხოლოდ ევროკავშირში გაწევრიანების, არამედ დამოუკიდებელი და მიუკერძოებელი სასამართლოს შექმნის და ქვეყნის განვითარების აუცილებელი წინაპირობა", — ნათქვამია განცხადებაში, რომელსაც ხელს აწერენ:

საქართველოს სასამართლოს გუშაგი;
დამოუკიდებელი იურისტების ჯგუფი;
საერთაშორისო გამჭვირვალობა - საქართველო;
დემოკრატიის მცველები;
საქართველოს დემოკრატიული ინიციატივა;
საქართველოს ახალგაზრდა იურისტთა ასოციაცია;
სოციალური სამართლიანობის ცენტრი;
სამართლიანი არჩევნებისა და დემოკრატიის საერთაშორისო საზოგადოება;
უფლებები საქართველო;
სამოქალაქო საზოგადოების ფონდი;
ინფორმაციის თავისუფლების განვითარების ინსტიტუტი (IDFI);
დემოკრატიის კვლევის ინსტიტუტი (DRI).