რა ხდება: საქართველოს ხელისუფლება "პროკრემლისტურად" მოიხსენია დავით არახამიამ ტელეგრამზე გამოქვეყნებულ პოსტში. ის არის უკრაინის უმაღლესი რადის დეპუტატი და მმართველი პარტიის საპარლამენტო ფრაქცია ხალხის მსახურის ხელმძღვანელი.

არახამიას 3 პირობა უკრაინისა და საქართველოს ხელისუფლების ურთიერთობის ნორმალიზებისთვის: "თუ ჩვენ ნამდვილად "ნორმალიზებაზე" ვსაუბრობთ, მაშინ, ამისთვის გეგმა არსებობს:

  • ციხიდან გაათავისუფლეთ და დააბრუნეთ უკრაინაში ჩვენი მოქალაქე მიხეილ სააკაშვილი.
  • შეწყვიტეთ პირდაპირი ფრენები რუსეთის ფედერაციასთან, რასაც ქართველი ხალხიც ითხოვს.
  • შეწყვიტეთ აგრესორის დახმარება, რომ თავი აარიდოს სანქციებს.

ამ შემთხვევაში, ურთიერთობების ნორმალიზება მარტივად მოხდება", — დაწერა მან.

რეაქციები თბილისში: არახამიას განცხადებას გამოეხმაურა კახა კალაძე, თბილისის მერი. მისი განცხადებიდან არ იკვეთება თანხმობა არახამიას პირობებზე.

უკრაინელი მაღალჩინოსნის საპასუხოდ კალაძემ მედიასთან აღნიშნა, რომ ის არ აპირებს არახამიასთან პოლემიკაში შესვლას.

  • კახა კალაძე: "რაც შეეხება ფრენების შეწყვეტასა და სანქციების მიერთებას, ჩვენი ქვეყნის ინტერესებიდან გამოვდივართ, ვერ და არ გადავდგამთ ისეთ ნაბიჯებს, რაც შეიძლება დამაზიანებელი იყოს ჩვენი ქვეყნის მოსახლეობისთვის.
  • მიხეილ სააკაშვილი კი ბრალდებულია კონკრეტულ საქმეებში, მას მძიმე დანაშაული აქვს ჩადენილი, შესაბამისად, ყველა ადამიანს მოუწევს კანონის წინაშე პასუხის გება."

გარდა ამისა, მმართველ გუნდში ისევ საუბრობენ, რომ დახმარება გაუწიეს უკრაინას. ამაზე ისაუბრა კალაძემ და ასევე, ირაკლი კობახიძემ, პრემიერ-მინისტრმა. "ეს არის 600-ზე მეტი მხარდაჭერილი აქტი, რეზოლუციები და დოკუმენტები, სხვა გადაწყვეტილებები, ეს არის ფართო ჰუმანიტარული დახმარება", — განაცხადა კობახიძემ.

ამასთან, საქართველოს პრემიერ-მინისტრმა კიდევ ერთხელ გაიმეორა რიტორიკა "მეორე ფრონტთან" დაკავშირებით.

  • ირაკლი კობახიძე: "შეგახსენებთ მეორე ფრონტთან დაკავშირებით პოდოლიაკის, დანილოვისა და სხვების განცხადებებს; შეგახსენებთ იმას, რომ ძებნილები და დამნაშავეები დღეს უკრაინაში კვლავაც იკავებენ მაღალ თანამდებობებს."

ბოლო ხაზი: ურთიერთობები საქართველოსა და უკრაინის ხელისუფლებებს შორის დაძაბულია რუსეთის მიერ, უკრაინაში დაწყებული სრულმასშტაბიანი ომის შემდეგ 2022 წლიდან.