რა ხდება: უკრაინული ტელეგრამ არხები და რუსი ბლოგერები იუწყებიან, რომ სავარაუდოდ, რუსეთის თავისუფლების ლეგიონის, რუსეთის მოხალისეთა კორპუსის და ციმბირის ბატალიონის შეიარაღებულმა ჯგუფებმა საზღვარი ერთობლივი ოპერაციის ფარგლებში გაარღვიეს.

  • ეხო კავკაზა წერს, რომ ეს შეიარაღებული ფორმირებები, ძირითადად, უკრაინის მხარეს მებრძოლი რუსებისგან შედგება.

დეტალები: არსებული ინფორმაციით, იყო შეტაკებები კურსკის ოლქში, სოფელ ტიოტკინოს მიდამოებში.

  • ინტერნეტში, ასევე, გავრცელდა ვიდეო, რომელშიც ნათქვამია, რომ უკრაინული ტანკი მოძრაობს ბელგოროდის სოფელ გორკოვსკისთან.
  • კიევში მცხოვრები ოპოზიციონერი პოლიტიკოსის, ილია პონომარევის თქმით, ბელგოროდის რეგიონის სასაზღვრო ქალაქი ლოზოვაია რუდკა "განმათავისუფლებელი ძალების კონტროლის ქვეშაა".
  • ლეგიონ რუსეთის თავისუფლების ტელეგრამ არხმა გამოაქვეყნა ვიდეო, სადაც, მათი ინფორმაციით, ჩანს საზღვრის გადაკვეთა.

რუსული სამხედრო არხი WarGonzo, წყაროებზე დაყრდნობით წერს, რომ 50-მდე ადამიანი ხარკოვის რეგიონიდან საზღვრის გარღვევას ცდილობდა. ისინი, სავარაუდოდ, თავდაპირველ პოზიციებზე დააბრუნეს.

  • WarGonzo ასევე იტყობინება, რომ დივერსანტები ცდილობდნენ ტიოტკინოში შეღწევას, მაგრამ ისინი უკან დახიეს.

რუსული სახელმწიფო არხის VGTRK-ის კორესპონდენტმა ანდრეი რუდენკომ თქვა, რომ სამშაბათს დილით, შეიარაღებული ფორმირებები ჯავშანტრანსპორტიორებით ცდილობდნენ ჩაეტარებინათ"დაზვერვა" კურსკის რეგიონში. რუდენკოს თქმით, ზოგიერთი დივერსანტი დაიღუპა, "დანარჩენები კი უკან დაიხიეს".

  • გავრცელებული ინფორმაციით, ტიოტკინოში ორი ადამიანი დაშავდა. ბაზას ინფორმაციით, ერთ-ერთი დაჭრილი ადგილობრივი მცხოვრებია. მეორეს შესახებ ინფორმაცია ზუსტდება.
  • წინასწარი მონაცემებით, ბრძოლა იქ კვლავ გრძელდება.

ოფიციალურად, მოსკოვსა და კიევს რუსეთის ორ რეგიონში საზღვრის გარღვევის შესახებ გავრცელებულ ცნობებზე კომენტარი არ გაუკეთებიათ.

  • უკრაინის თავდაცვის სამინისტროს სამხედრო დაზვერვის წარმომადგენელმა, ანდრეი იუსოვმა ჟურნალისტებთან აღნიშნა, რომ ლეგიონი რუსეთის თავისუფლება, რუსეთის მოხალისეთა კორპუსი და ციმბირის ბატალიონი, რუსეთის ტერიტორიაზე მოქმედებენ, როგორც დამოუკიდებელი ნაწილები, რადგან ეს ფორმირებები რუსეთის მოქალაქეებისგან შედგება.

საომარი მოქმედებების პირობებში, მხარეების განცხადებების სწრაფად გადამოწმება შეუძლებელია.