თუ ბავშვობა და თინეიჯერობა შენც ბინდის საგის კითხვასა და ყურებაში გაატარე, მაშინ საინტერესო სიახლე გვაქვს: მალე ბინდი ანიმაციური სერიალის სახით გამოვა! მასზე კვლავ კომპანია Lionsgate იმუშავებს, რომელმაც საგის ხუთივე ფილმი გადაიღო. ინფორმაცია კომპანიის ვიცეპრეზიდენტმა მედიასთან დაადასტურა.

ბინდის სერიალად ადაპტაციის შესახებ ცნობილი ჯერ კიდევ გასულ წელს გახდა, თუმცა ანიმაციის ფორმატი ნამდვილად სიახლეა. ანიმაციური სერიალიც, ფილმების მსგავსად, სტეფანი მეიერის ბესტსელერის მიხედვით შეიქმნება.

ბინდის საგის ფილმებმა, სადაც მთავარი როლები რობერტ პატინსონმა, კრისტენ სტიუარტმა და ტეილორ ლოტნერმა შეასრულეს, მსოფლიოში ჯამურად $3,4 მილიარდზე მეტი გამოიმუშავა. კინოსერიის ბოლო ნაწილის პრემიერა 2012 წელს შედგა, თუმცა, საგა პოპულარობას ახალ თაობაშიც ინარჩუნებს.

მეიერმა ბინდის საგის პირველი რომანი 2005 წელს გამოსცა. სერიის ოთხწიგნეული 37 ენაზე ითარგმნა და მსოფლიოში 100 მილიონზე მეტ ეგზემპლარად გაიყიდა, რამაც მწერალს $125-მილიონიანი შემოსავალი და თანამედროვეობის ერთ-ერთი ყველაზე აღიარებული ავტორის სახელი მოუტანა. სულ რამდენიმე წლის წინ მეიერმა საგის კიდევ ერთი წიგნი, დიდი ხნის წინ დაწყებული და დაუსრულებელი რომანი შუაღამის მზე გამოსცა და განაცხადა, რომ ბელასა და ედვარდის ამბავთან დაკავშირებული კიდევ ორი წიგნის დაწერას აპირებს.

ამავე თემაზე: