დღეს, 19 ივლისს, ქართველთა მარშის ორგანიზატორთა ნაწილი გაუპატიურების მუქარასთან დაკავშირებით შინაგან საქმეთა სამინისტროში, გამოკითხვაზე დაიბარეს.

ამასთან, შსს-ში არ აზუსტებენ კონკრეტულად ვინ არის უწყებაში დაბარებული.

გაეროში საქართველოს ახალგაზრდობის ყოფილი წარმომადგენლის, თათია დოლიძის მიმართ გაუპატიურების ღია მუქარასთან დაკავშირებით შინაგან საქმეთა სამინისტომ გამოძიება 151-ე, მუქარის მუხლით, გუშინ დაიწყო.

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა.

აღნიშნული პოსტი ორი დღეა აღარ იძებნება. პოსტის წაშლის შემდეგ, კომენტარების ავტორთა ნაწილი ამბობდა, რომ მათ ეს არ დაუწერიათ. თუმცა მას შემდეგ, გია კორკოტაშვილმა აღიარა, რომ აღნიშნული კომენტარები ნამდვილად მას ეკუთვნოდა და თქვა, რომ საბოდიშოც არაფერი აქვს.

"ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური განწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.