ქართული მარშის ერთ-ერთი ორგანიზატორი გია კორკოტაშვილი, რომლის წინააღმდეგაც გამოძიება მუქარის მუხლით მიმდინარეობს, აცხადებს, რომ საბოდიშო არაფერი აქვს. ამის შესახებ მან ობიექტივის ეთერში განაცხადა.

თათია დოლიძის მიმართ მისი სახელით დაწერილი კომენტარებს, რომლებიც მუქარად აღიქმებოდა, კორკოტაშვილი აღარ უარყოფს. ის აცხადებს, რომ "ცოტა უზრდელურად დაწერა" და მიიჩნევს, რომ ორ ადამიანს შორის საუბარი მუქარა არ არის:

"იქ დამიწერეს, რომ გაუპატიურებით დაემუქრნენ. გაუპატიურებით დამუქრება არის, როდესაც ადამიანს პირადად დაურეკავ და ეტყვი, რომ მე შენ გიზამ ამას და ამას. ორ ადამიანს შორის რა სლენგია, უზრდელური თუ არის და გინებით თუ გამოვხატავ მე ამას, ვისი რა საქმე არის გამაგებინეთ. მე არსად არაფერი საბოდიშო არამაქვს".

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა.

დღეს, აღნიშნული პოსტი აღარ იძებნება, თავად პოსტების ავტორთა ნაწილი კი ამბობს, რომ მათ ეს არ დაუწერიათ. გია კორკოტაშვილის შვილმა, სალომე კორკოტაშვილმა, ფეისბუკზე გუშინ დაწერა, რომ მამამისს, "ფეისბუკი გაუტეხეს".

"ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური განწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.

გაეროში საქართველოს ახალგაზრდობის ყოფილი წარმომადგენლის, თათია დოლიძის, მიმართ გაჟღერებულ მუქარაზე, შინაგან საქმეთა სამინისტრომ გამოძიება 17 ივლისს დაიწყო.