მოკლედ: ალექსეი ნავალნის პრესმდივანი კირა იარმიში X-ზე წერს, რომ გუშინ, 23 თებერვალს, რუსეთის სახელმწიფო გამომძიებლებმა ალექსეი ნავალნის დედას ულტიმატუმი წაუყენეს — თუ ლუდმილა ნავალნაია სამი საათის განმავლობაში არ დათანხმდებოდა შვილის საიდუმლოდ დაკრძალვას, პოლიტიკოსს იმ ციხეში დაკრძალავდნენ, სადაც გარდაიცვალა.

დეტალები: პრესმდივნის თქმით, ლუდმილა ნავალნაიამ უარი თქვა საგამოძიებო კომიტეტის ამ ულტიმატუმის შესრულებაზე, რადგან "მათ არ აქვთ უფლება გადაწყვიტონ სად და როდის დაკრძალავენ მის [ლუდმილა ნავალნაიას] შვილს".

  • ალექსეი ნავალნის დედა მოითხოვს, გათვალისწინებულ იქნას კანონით დადგენილი ნორმა, რომლის მიხედვით გარდაცვალების მიზეზის დადგენიდან 2 დღის ვადაში, ცხედარი ოჯახს უნდა გადაეცეს.
  • კირა იარმიში წერს, რომ სამედიცინო დოკუმენტების თანახმად, ეს ორდღიანი ვადა დღეს, 24 თებერვალს იწურება.
  • "ნავალნის დედა დაჟინებით მოითხოვს, რომ ხელისუფლებამ მისცეს უფლება, ალექსეი ნავალნის დაკრძალვა ტრადიციული წესით ჩაატაროს", — წერს კირა იარმიში.

გაიგე მეტი: ალექსეი ნავალნის ცხედრის ოჯახისთვის გადაცემის მოთხოვნით, რუსი ბლოგერები ვიდეოებს წერენ

კონტექსტი: 22 თებერვალს ალექსეი ნავალნის დედამ ლუდმილა ნავალნაიამ განაცხადა, რომ შვილის ცხედარი აჩვენეს, თუმცა დასაკრძალად არ გადასცეს.

  • მისი თქმით, მოთხოვნაა, გარდაცვლილი პოლიტიკოსი ჩუმად დაიკრძალოს, რაზეც ოჯახი უარს ამბობს.
  • "გამომძიებელმა ვარაპაევმა ღიად მითხრა — დრო თქვენს სასარგებლოდ არ მუშაობს, ცხედარი იხრწნება", — ამბობს ლუდმილა ნავალნაია.

ბოლო ხაზი: 2024 წლის 16 თებერვალს რუსეთის ფედერალური სასჯელაღსრულების სამსახურმა გაავრცელა ცნობა, რომ ოპოზიციონერი პოლიტიკოსი, ალექსეი ნავალნი სპეციალური რეჟიმის კოლონიაში გასეირნების შემდეგ გარდაიცვალა.

  • გარდაცვალების მიზეზი, ჯერჯერობით, უცნობია.
  • ოპოზიციონერის თანამოაზრეები მიიჩნევენ, რომ ის მოკლეს და კრემლი დანაშაულის კვალის დამალვას ცდილობს.