მოკლედ: ალექსეი ნავალნის დედამ ჩაწერა ვიდეომიმართვა, სადაც ამბობს, რომ შვილის ცხედარი აჩვენეს.

  • "ეს-ესაა გამოვედი ქალაქ სალეხარდის საგამოძიებო კომიტეტიდან. თითქმის 24 საათი გავატარე მე იქ, მარტომ, გამომძიებლებთან და კრიმინალისტებთან ერთად. ადვოკატი მხოლოდ დღეს, დღის მეორე ნახევარში შემოუშვეს. გუშინ ღამით მათ ჩუმად წამიყვანეს მორგში, სადაც მაჩვენეს ალექსეი", — განაცხადა ლუდმილა ნავალნაიამ.

დეტალები: ლუდმილა ნავალნაიას თქმით, გამომძიებლები ამტკიცებენ, რომ გარდაცვალების მიზეზი იციან, მზად აქვთ ყველა სამედიცინო და იურიდიული დოკუმენტი. "ეს დოკუმენტები მე ვნახე, ხელი მოვაწერე გარდაცვალების მოწმობას.

  • "კანონით, მათ დაუყოვნებლივ უნდა გადმოეცათ ჩემთვის ალექსეის ცხედარი, თუმცა, ეს ჯერ კიდე არ გაუკეთებიათ", — თქვა ნავალნის დედამ. მისი თქმით, მას აშანტაჟებენ და უყენებენ პირობას, სად, როდის და როგორ უნდა დაასაფლავონ ნავალნი.
  • "ჩემი თანდასწრებით მოსდით ბრძანებები, ან კრემლიდან, ან საგამოძიებო კომიტეტის ცენტრალური აპარატიდან. მათ სურთ, რომ დაკრძალვა მოხდეს ჩუმად, გამომშვიდობების გარეშე. მათ სურთ, მიმიყვანონ სასაფლაოს განაპირას, ახალ საფლავთან და მითხრან — აი, აქ არის დაკრძალული თქვენი შვილი. მე ამაზე თანახმა არ ვარ", — თქვა ლუდმილა ნავალნაიამ.
  • ლუდმილა ნავალნაიას თქმით, ვიდეოს ჩაწერა გადაწყვიტა იმიტომ, რომ ემუქრებიან. მას უთხრეს, რომ თუ არ დათანხმდება ნავალნის ჩუმად დაკრძალვას, "მის ცხედარს რაღაცას უზამენ".
  • "გამომძიებელმა ვარაპაევმა ღიად მითხრა — დრო თქვენს სასარგებლოდ არ მუშაობს, ცხედარი იხრწნება", — ამბობს ლუდმილა ნავალნაია.

ბოლო ხაზი: 2024 წლის 16 თებერვალს რუსეთის ფედერალური სასჯელაღსრულების სამსახურმა გაავრცელა ცნობა, რომ ოპოზიციონერი პოლიტიკოსი, ალექსეი ნავალნი სპეციალური რეჟიმის კოლონიაში გასეირნების შემდეგ გარდაიცვალა.

  • გარდაცვალების მიზეზი, ჯერჯერობით, უცნობია.
  • ოპოზიციონერის თანამოაზრეები მიიჩნევენ, რომ ის მოკლეს და კრემლი დანაშაულის კვალის დამალვას ცდილობს.
  • ლუდმილა ნავალნაიამ, შვილის გარდაცვალების შემდეგ, თქვა, რომ რამდენიმე დღის წინ მასთან პაემანზე იმყოფებოდა ციხეში. დედის თქმით, პოლიტიკოსი თავს კარგად გრძნობდა და ჯანმრთელობას არ უჩიოდა.
  • ამაზე მეტყველებს გარდაცვალებამდე ერთი დღით ადრე, 15 თებერვალს, ნავალნის ვიდეო-ჩართვა სასამართლოზე.

გაიგე მეტი: იულია ნავალნაია: ალექსეი ნავალნის საქმეს მე გავაგრძელებ