მოკლედ: ორგანიზაცია საზოგადოება და ბანკები აცხადებს, რომ სოციალურ ქსელებში ახალი თაღლითური სქემა ამოქმედდა და მოსახლეობას სიფრთხილისკენ მოუწოდებს.

დეტალები: მათი თქმით, ვრცელდება რეკლამები, სადაც ინტერნეტმომხმარებლებს, მცირე ინვესტიციით, დიდ ამონაგებს ჰპირდებიან;

  • ან — სთავაზობენ დასაქმებას.

ასევე, საზოგადოება და ბანკების მიხედვით, თაღლითები მომხმარებლებს სოციალური ქსელით, სხვადასხვა აპლიკაციით უკავშირდებიან — მათ შორის, ვოთსაფით და ვაიბერით,
ცდილობენ დაარწმუნონ, რომ განახორციელოს ინვესტიცია, ივაჭროს სხვადასხვა
აქციებით ან აქტივებით, ამისთვის ურჩევენ აპლიკაციის დაყენებას.

  • მას შემდეგ, რაც მომხმარებელი ვერ შეასრულებს მათ ინსტრუქციას დისტანციურად, თითქოს და დახმარების მიზნით, სთავაზობენ ენიდესკის, ან — სხვა მსგავსი აპლიკაციის დაყენებას.
  • აპლიკაციის დაყენების შემდეგ კი მომხმარებელი თაღლითს აძლევს საკუთარ მოწყობილობაზე წვდომას.

"იყო შემთხვევები, როდესაც მომხმარებლები დაგვიკავშირდნენ და მოგვიყვნენ, რომ უყურებდნენ მათსავე მოწყობილობაში, როგორ იაქტიურებდა კიბერთაღლითი სესხს, ან რიცხავდა თანხას.

  • არის შემთხვევები, როდესაც მომხმარებლებს არწმუნებენ, რომ გადარიცხვას თვითონვე აკეთებენ და შემდეგ, როცა ვერ იღებენ ამონაგებს, მერე ხვდებიან, რომ თაღლითობის მსხვერპლი გახდნენ.
  • ასევე იყო შემთხვევები, როდესაც აშანტაჟებდნენ და ისე არიცხინებდნენ თანხას", — წერია საზოგადოება და ბანკების განცხადებაში.

როგორ დავიცვათ თავი: ორგანიზაციის რჩევით,

  • არ გადმოწეროთ აპლიკაციები სხვისი დავალებით, მითუმეტეს, ისეთი აპლიკაციები, რომელიც საშუალებას აძლევს თაღლითს შემოვიდეს თქვენს მოწყობილობაში.
  • არ მისცეთ წვდომა თქვენს მოწყობილობაზე არავის.
  • დიდ კომპანიებში დასაქმების დაპირების შემთხვევაში, აუცილებლად გადაამოწმეთ, რამდენად რეალურია შემოთავაზება.