ამერიკის შეერთებული შტატების პრეზიდენტის, დონალდ ტრამპის რუსეთთან კავშირებს გამოძიების პარალელურად, ამერიკული მედია მნიშვნელოვან ფაქტებზე წერს. კერძოდ, 2016 წლის ივნისში, როცა ტრამპი პრეზიდენტობის კანდიდატი იყო, მისი შვილი, დონალდ ტრამპ უმცროსი, ტრამპ თაუერში შეხვდა რუსეთის ხელისუფლების ინტერესების გამტარებელ რამდენიმე პირს. როგორც CNN იტყობინება, შეხვედრა რუსული მხარის ინიციატივით გაიმართა და მიზანი ტრამპისთვის მისი კონკურენტის, ჰილარი კლინტონის შესახებ მაკომპრომეტირებელი მასალების მიწოდება იყო.

სწორედ ამ შეხვედრის ერთ-ერთი მნიშვნელოვანი მონაწილეა წარმოშობით ქართველი ირაკლი (აიკ) კაველაძე. ის ამ შეხვედრაზე პუტინთან დაახლოებულ რუს ოლიგარქს, არას აგალაროვს წარმოადგენდა. ბოლო დრომდე, ამ ფარული შეხვედრის მხოლოდ შვიდი მონაწილის შესახებ იყო ცნობილი.

კაველაძე სამშენებლო კომპანია კროკუს გრუპის უფროსი ვიცე-პრეზიდენტია. ამერიკის ხმის ცნობით, აღნიშნული კომპანია, აზერბაიჯანული წარმოშობის სწორედ არას აგალაროვის მიერაა მართული.

აგალაროვის, რუსეთის ხელისუფლების გარდა, უკვე წლებია, კავშირები აქვს დონალდ ტრამპთან. The Washington Post-ის ინფორმაციით, ტრამპის მიერ დაფუძნებულ კონკურს "მის სამყაროს", 2013 წელს, სწორედ აგალაროვმა უმასპინძლა რუსეთში. გარდა ამისა, ტრამპსა და აგალაროვს რუსეთში ტრამპ თაუერის აშენებაც სურდათ, მაგრამ პროექტი 2014 წელს, რუსეთის წინააღმდეგ დაწესებული სანქციების გამო ჩაიშალა.

კაველაძის პირად ვებგვერდზე ვკითხულობთ, რომ ის "კომპანიის რუსეთის პროექტებში მრავალ ელემენტზეა პასუხისმგებელი". ვებგვერდი წერია, რომ ის მოსკოვის ფინანსების აკადემიაში სწავლობდა და კონექტიკუტის შტატის ნიუ-ჰევენის უნივერსიტეტში ბიზნესის მაგისტრის ხარისხი აქვს მიღებული.

კაველაძის ვინაობა მისმა ადვოკატმა, სკოტ ბალბერმა დაადასტურა. მისი მტკიცებით, კაველაძე დიდი ხანია შეერთებული შტატების მოქალაქეა, რუსულ ენას კარგად ფლობს და "რუსეთის მთავრობასთან არასდროს არანაირი შეხება არ ჰქონია".

ამერიკის ხმისთვის ცნობილი გახდა, რომ კაველაძე ქართულად საუბრობს და ამჟამად კალიფორნიის შტატში ცხოვრობს. არსებული ინფორმაციით, კაველაძე აშშ-ში 1990-იანი წლების დასაწყისში გადასახლდა.

კაველაძის ადვოკატის თქმით, საგანგებო პროკურორის გამომძიებლებს მისი კლიენტისგან ინფორმაციის მიღება სურთ და გამოძიებისგან გამომდინარე, პროკურორებთან სრულად თანამშრომლობენ.

ეს არ არის პირველი შემთხვევა, როცა წარმოშობით ქართველი ირაკლი კაველაძე ამერიკის შეერთებულ შტატებში პოლიტიკური სკანდალის ეპიცენტრში აღმოჩნდა. 2000 წელს აშშ-ს კონგრესი იძიებდა რუსული კომპანიების მიერ ამერიკული ბანკების საშუალებით ფულის გათეთრების შესაძლო ფაქტებს. კაველაძის, როგორც რუსული ბიზნესის წარმომადგენლის სახელი, ამერიკელი კანონმდებლობისთვის სწორედ იმ დროს გახდა ცნობილი, თუმცა გამოძიება უშედეგოდ, დანაშაულის დამტკიცების გარეშე დასრულდა.