საქართველოს ბანკი ქმნის განათლების შესაძლებლობებს მათთვის, ვინც არ ჩერდება. ნიჭიერი და მოტივირებული ახალგაზრდებისთვის პოტენციალის გამოვლენის ხელშეწყობის და მომავლის პროფესიებით მათი დაინტერესების მიზნით, ბანკმა კომაროვის სკოლასთან თანამშრომლობით შექმნა STEM სკოლა.

STEM სკოლა შესაძლებლობას აძლევს მთელი საქართველოს მასშტაბით მცხოვრებ მოსწავლეებს, გაიარონ რამდენიმეთვიანი ინტენსიური კურსი და დაეუფლონ როგორც ზუსტი ასევე საბუნებისმეტყველო მეცნიერებების საფუძვლებს. პროექტზე რეგისტრაცია დღეს, 16 თებერვალს დასრულდება.

STEM სკოლაში ცნობისმოყვარე და მოტივირებული მოსწავლეები იღებენ თეორიულ ცოდნას ფიზიკის, მათემატიკის, ინჟინერიის და ტექნოლოგიის სფეროში, ამავდროულად კი პროფესიონალების დახმარებით ქმნიან და მართავენ ჭკვიან მოწყობილობებს, რითაც თეორიას პრაქტიკაში ცდიან.

STEM სკოლის ონლაინ გაკვეთილები კვირაში ერთხელ სამი საათის განმავლობაში ტარდება. ის რომ გაკვეთილები ონლაინ მიმდინარეობს პროექტში მონაწილე მოსწავლეებს აძლევს შესაძლებლობას, საქართველოს ნებისმიერი რეგიონიდან ჩაერთონ და მიიღონ მონაწილეობა გაკვეთილებში.

საკუთარი გამოცდილება გაგვიზიარა STEM სკოლის მოსწავლემ, ნიკუშა ცხადაძემ, რომელიც ზესტაფონიდანაა. ის 15 წლისაა და მან STEM სკოლაში საქართველოს ბანკის სრული დაფინანსება მოიპოვა.

"რაც თავი მახსოვს, ფიზიკა და მეცნიერება ყოველთვის მაინტერესებდა, მგონი, ბაღის ასაკიდან ვსვამდი კითხვებს ყველაფრის შესახებ. არ ველოდი, რომ დაფინანსებას მივიღებდი, მაგრამ თუ არ სცადე, არაფერი გამოვა და თუ გზას ვერ პოულობ შენი მიზნების მისაღწევად, ესე იგი, საკმარისად არ გინდა ან არ ცდილობ, მე ასე მჯერა."

STEM სკოლაში ნიკუშა სწავლობს, როგორ მართოს მიკროკონტროლერები, იყენებს Tinkercard-ის ონლაინპლატფორმას და ემზადება პროექტის შესაქმნელად. ნიკუშამ პირველი მოდული უკვე დაასრულა, სწავლების მეორე მოდულზე უკვე საკუთარი ცოდნის ინტერპრეტირებას შეძლებს. როგორც თავად ამბობს, დისტანციური სწავლების გარეშე პროექტში მონაწილეობას ვერ შეძლებდა:

"ზესტაფონში ასეთი შესაძლებლობები ნაკლებად გვაქვს, აქამდე ქიმიის, ფიზიკის, მათემატიკის ოლიმპიადებში ვიღებდი მონაწილეობას. თუკი რამეს ვიპოვი, რაც ახლოს არის ჩემს ინტერესებთან, ხელიდან არ ვუშვებ. STEM სკოლის მსგავს პროექტში აქამდე არ მიმიღია მონაწილეობა, სრულიად განსხვავებულია სკოლის გაკვეთილებისგან, ძალიან საინტერესო და მრავალფეროვანია."

ნიკუშა მომავალშიც სწავლის გაგრძელებას STEM მიმართულებით გეგმავს, განსაკუთრებით კი ხელოვნური ინტელექტი აინტერესებს:

"ხელოვნური ინტელექტი ადამიანის მიერ შექმნილი პროგრამაა, რომელსაც ციფრულად წარმოუდგენლად ბევრი რამის გაკეთება შეუძლია. ის სულ უფრო და უფრო ვითარდება და მეჩვენება, რომ უსაზღვრო შესაძლებლობები აქვს. მართალია, ხელოვნური ინტელექტი გარკვეულ პროფესიებს ,"აქრობს", მაგრამ ადამიანს სრულიად ვერასდროს ჩაანაცვლებს, ის ადამიანები, რომლებიც კოდებს წერენ, მართავენ და ავითარებენ ჭკვიან სისტემებს, ყოველთვის საჭირონი იქნებიან."

ნიკუშას ოცნება მოგზაურობაა, ხელოვნური ინტელექტზე მუშაობას კონკრეტულ ადგილზე ყოფნა არ სჭირდება, ამიტომ აპირებს, რომ მომავალში ბევრი იმოგზაუროს და მსოფლიო შემოიაროს:

"სწავლის გაგრძელებას საზღვარგარეთ ვაპირებ, თუმცა აუცილებლად დავბრუნდები საქართველოში, მგონია, რომ მე და ჩემი თაობა მომავალში ქვეყნისთვის ბევრ კარგ საქმეს გავაკეთებთ, STEM სკოლაში კიდევ უფრო თავდაჯერებული გავხდი, რაც რთულად მეჩვენებოდა, ახლა არც ისე მიუღწეველი ჩანს. მგონია, რომ თუ ვიშრომებ, ყველაფერს შევძლებ."

საქართველოს ყველა რეგიონსა და კუთხეში არიან ნიკუშასნაირი ბავშვები ოცნებებით, მიზნებით, უსაზღვრო შესაძლებლობით. STEM სკოლა და საქართველოს ბანკის საგანმანათლებლო პროექტები, სწორედ ასეთი მოსწავლეების აღმოჩენისთვის იქმნება.

კომბინირებულ გამოცდაში მიღებული ქულების მიხედვით საქართველოს ბანკის სტიპენდია STEM სკოლის 100-მდე მოსწავლემ უკვე დაიმსახურა, ყოველწლიურად კი კიდევ დამატებით 60-მდე მოსწავლეს დაუფინანსდება სწავლა. სტიპენდიატ მოსწავლეებს ასევე გადაეცემათ კურსის გასავლელად საჭირო მოწყობილობები (არდუინოების ნაკრები, მულტრიმეტრი და სხვა).

საქართველოს ბანკი განაგრძობს ახალი თაობისა და განათლების მხარდაჭერას, მთავარი იდეით — თანამედროვე სამყაროში ყველა ბარიერი დაძლევადია, შენი მიზნებისკენ გზა სულ არის.

საქართველოს ბანკის მიერ კორპორატიული სოციალური პასუხისმგებლობის მიმართულებით შექმნილი სხვა შესაძლებლობების შესახებ, უფრო ვრცლად შეგიძლიათ გაიგოთ ბმულზე CSR.BOG.GE

ნიკუშას შესახებ ვიდეოს სანახავად შეგიძლიათ ეწვიოთ ბმულს: https://www.youtube.com/shorts/Aug1XtdyKzs